മുറ

വ്യത്യസ്ത സാഹചര്യങ്ങളിൽ നിന്നും വരുന്ന നാല് ആത്മാർത്ഥ സുഹൃത്തുക്കൾ..അടിച്ചു പൊളിച്ചു ജീവിക്കണം എന്ന ചിന്തയിൽ നടക്കുന്നവരെ റാഞ്ചാൻ കാത്തു നിൽക്കുന്ന ക്വട്ടേഷൻ സംഘം അവരെ ചെറിയ ചെറിയ കാര്യങ്ങൽ ഏൽപ്പിക്കുന്നു..എല്ലാം നല്ലരീതിയിൽ ചെയ്തു കൊടുക്കുമ്പോൾ സംഘത്തിന് അവരെ വിശ്വാസം ഉണ്ടാകുന്നു.

 അവരുടെ സ്വപ്നം വലുതായപ്പോൾ വലിയ വലിയ ജോലികൾ ഏറ്റെടുക്കുവാൻ നിർബന്ധിതരാകുന്നു. അവിടെ അവർക്കുണ്ടാകുന്ന വെല്ലുവിളികളും നഷ്ടങ്ങളും ആണ് മുറ.ആത്മാർത്ഥ കൂട്ടുകാരുടെ സന്തോഷവും നൊമ്പരവും അവർ തമ്മിലുള്ള ബന്ധങ്ങളുടെ തീവ്രതയും ആഴവും ഒക്കെ മനോഹരമായി ചിത്രീകരിച്ചിട്ടുണ്ട്.പരസ്പര വിശ്വാസത്തിൻ്റെ അടിസ്ഥാനം ജാതിയോ,മതമോ, നാടോ , വീടോ ഒന്നുമല്ലെന്നു ഇവർ വിളിച്ചു പറയുന്നുണ്ട്..

ദേശീയ അവാർഡ് ജേതാവും സംവിധായകനും നടനുമായ മുഹമ്മദ് മുസ്തഫ അണിയിച്ചൊരുക്കുന്ന ചിത്രത്തിൽ ഏറെക്കുറെ മുഴുവൻ അധികം പരിചയമില്ലാത്ത മുഖങ്ങൾ ആണെങ്കിലും അഭിനയത്തിൽ ചിരപരിചിതരെ പോലെ തോന്നിപ്പിക്കുന്ന വിധം അവരവരുടെ റോളുകൾ മനോഹരമാക്കിയിട്ടുണ്ട്.

നമ്മുടെ നാടുകളിൽ വർദ്ധിച്ചു വരുന്ന ക്വട്ടേഷൻ സംഘങ്ങൾ സമൂഹത്തിന് ഭീഷണി ഉയർത്തി തുടങ്ങിയിട്ട് കാലമേറെയായി..അധികാരികളുടെ ഭാഗത്ത് നിന്ന് എന്തെങ്കിലും പ്രശ്നം ഉണ്ടാകുമ്പോൾ ചില ചില്ലറ നിയന്ത്രണങ്ങൾ ഉണ്ടാകും എങ്കിലും പിന്നീട് അങ്ങോട്ട് കാര്യങ്ങൾ തഥൈവ..

പൊതുയിടങ്ങളിൽ പരസ്പരം പോരടിച്ചു വെട്ടിയും കുത്തിയും സമൂഹത്തിന് പ്രശ്നങ്ങൾ സൃഷ്ടിക്കുന്നു .അത്തരം ഒരു ചുറ്റുപാടാണ് ഇത്തവണ മുസ്തഫയുടെ തീം.കപ്പേള എന്ന ചിത്രത്തിലൂടെ തൻ്റെ മുദ്ര പതിപ്പിച്ച അദ്ദേഹം ഈ ചിത്രത്തിലൂടെ താനൊരു മികച്ച ഫിലിം മേക്കർ ആണെന്ന് തെളിയിച്ചിരിക്കുന്നു.

പ്ര.മോ.ദി.സം