ഇതുവരെ

 

ശക്തമായ സമകാലിക   പ്രമേയം കൊണ്ട് ധാരാളം സിനിമകൾ ഇറങ്ങുന്നുണ്ട് എങ്കിലും ജനത്തിന് പലപ്പോഴും അത് സിൽവർ സ്ക്രീനിൽ കാണാൻ താൽപര്യം ഇല്ല..അവർക്ക് അടിച്ചു പോളി സിനിമകളും പൈങ്കിളി കഥകളും  മറ്റുമാണ് ഇഷ്ടം.

നമ്മുടെ നാടിൻ്റെ ജീവനും സ്വത്തിനും ആവാസവ്യവസ്ഥക്കും ഭീഷണിയായ രണ്ടു സംഭവങ്ങൾ അവതരിപ്പിക്കുന്നു ഈ കൊച്ചു ചിത്രം. ഒന്ന് നഗരത്തിലും മറ്റൊന്ന് ഗ്രാമത്തിലും...മനുഷ്യൻ സ്വാർത്ഥതയുടെ പിടിയിൽ അകപ്പെടുമ്പോൾ മറക്കുന്നത് ചുറ്റും ഉള്ള ജീവനുകളെയാണ്. അടുത്ത തലമുറയെ കുറിച്ച് ചിന്തിക്കാതെ സ്വന്തം കാര്യം മാത്രം മനസ്സിലിട്ടു അവൻ പ്രകൃതിയെ കൊല്ലുകയാണ്..

ജനങ്ങളെ പറഞ്ഞിട്ട് കാര്യമില്ല..കാരണം എൻ്റർടൈന്മെൻ്റ് ആണ് സിനിമ..അത് അവരെ രസിപ്പിക്കാൻ പറ്റുന്നത് ആയിരിക്കണം.മുൻപൊക്കെ അവാർഡ് ഫിലിം എന്ന് കാറ്റഗറി സിനിമക്ക് പ്രത്യേക കാണികൾ ഉണ്ടായിരുന്നു.അവർ അത് രസിച്ചിരുന്ന് കണ്ടൂ..പക്ഷേ ഇന്ന് മനുഷ്യന് ഒന്നിനും സമയമില്ല അത്രക്ക് ടെൻഷൻ കൊണ്ട് ജീവിക്കുന്ന സമൂഹം ഓഫ് ബീറ്റ് സിനിമകൾ കാണാൻ മിനക്കെടാറില്ല.  ചൂണ്ടിക്കാട്ടുന്ന  ഇത്തരം പ്രമേയങ്ങൾ തൻ്റെ ജീവിതത്തിലെ വലിയ "ബാധ്യത" എന്നറിഞ്ഞിട്ടും അവർക്ക് ഇത്തരം ചിത്രങ്ങളോട് താൽപര്യം ഇല്ല.

ഒന്ന് രണ്ടു ആഴ്ചകൾ കൊച്ചി നഗരത്തിനെ പുക തീറ്റിയ ബ്രഹ്മപുരം മാലിന്യ പ്ലാൻ്റിൻ്റെ കാര്യകാരണങ്ങൾ വളരെ സമർത്ഥമായി അവതരിപ്പിച്ച ഈ ചിത്രത്തിൽ പ്ലാൻ്റ് കൊണ്ട് ജീവിതം കൊഞാട്ട ആയവർക്ക് നീതി കിട്ടിയില്ല എന്നത് കൃത്യമായി പറഞ്ഞിട്ടുണ്ട്..കോടതി പോലും പുറം തിരിഞ്ഞു നിന്നു എന്നതും...

അധികാരത്തിൻ്റെ കൈവഴികൾ ജനങ്ങളുടെ നെഞ്ചില് കയറുമ്പോൾ അതിനെ പ്രതിരോധിക്കുവാൻ ജനങ്ങളുടെ അവസാന പ്രതീക്ഷയായ കോടതി പോലും പുറം തിരിഞ്ഞു നിൽക്കുന്ന അവസരത്തിൽ അവനു അവിടം വിട്ടു ഓടുക അല്ലാതെ മറ്റു പ്രതിവിധിയില്ല.അല്ലെങ്കിൽ എല്ലാം സഹിച്ചു 

ദുർഗന്ധത്തിനും രോഗത്തിനും ഇടയിൽ മരിച്ചു  ജീവിക്കണം. സ്വന്തം നാടും വീടും വിട്ട് വേറെ എവിടെയെങ്കിലും പോകുന്നത് ഇപ്പോഴത്തെ തലമുറക്ക് വിഷയം അല്ലെങ്കിലും തൻ്റെ ഈറ്റില്ലം വിട്ടു പോയാൽ മരണം എന്ന് വിശ്വസിക്കുന്ന ആൾക്കാർ ധാരാളം.

അങ്ങിനെ ജീവിച്ചു മരണത്തിലേക്ക് പോകുമ്പോൾ രക്ഷപെടുവാൻ മല കയറി പോയവർക്ക് അവിടെ പാറമട കൊണ്ടുണ്ടാകുന്ന ഭീഷണി കൂടിയാവുമ്പോൾ ജീവിതത്തിന്  മുന്നോട്ടുള്ള പ്രയാണത്തിന് തടസ്സം നേരിടുകയാണ് .അതോടെ അനീതിക്കെതിരെ പ്രതികരിക്കണം ജീവിക്കണം എന്ന വാശി അവനിൽ കടന്നു കൂടുകയാണ്.

തെറ്റുകൾ നാട്ടുകാർക്ക് ചൂണ്ടി കാണിക്കുന്നു ബോധ്യപ്പെടുത്തുന്നു   എങ്കിലും ജോലിയും പണവും കിട്ടുന്നത് കൊണ്ട് അവർക്കിടയിൽ  എതിർപ്പുകൾ ഉണ്ടാവുകയാണ്..ബ്രഹ്മപുരത്ത് തോറ്റ് പോയവര് ഇവിടെ വിജയിക്കാൻ വേണ്ടി പോരാടുന്നത് ആണ് പിന്നീട് കാണുന്നത്.. അതി ജീവനത്തിൻ്റെ സമരം..പ്രകൃതിക്കും മനുഷ്യനും വേണ്ടി....അനിൽ തോമസ് ആണ് സംവിധായകൻ..

പ്ര.മോ.ദി.സം