ഉദയനാണ് താരം എന്ന ചിത്രത്തിൽ നമ്മുടെ ജഗതി ശ്രീകുമാർ നായകനായ ശ്രീനിവാസനെ നവരസങ്ങൾ കാണിക്കുന്ന ഒരു രംഗമുണ്ട്.അതിൽ നന്നായി തന്നെ ജഗതി എല്ലാ ഭാവങ്ങളും കാണിച്ചു തരുന്നുണ്ട് എങ്കിൽ പോലും ചില ഭാവങ്ങൾ കാണുമ്പോൾ ചിലർക്ക് ഒരു "പോരായ്മ" തോന്നുന്നുണ്ട്. അത് അവർക്ക് നവരസങ്ങൾ എന്താണെന്ന് പൂർണമായും അറിയാത്തത് കൊണ്ടാണെന്ന് ചിലർ വാദിച്ചാൽ പോലും ചില ഭാവങ്ങൾ സത്യത്തിൽ പൂർണമായും നമുക്ക് പലർക്കും ആസ്വദിക്കുവാൻ കഴിഞ്ഞിട്ടില്ല. കാരണം ചില ഭാവങ്ങൾ മിന്നി മറയണമെങ്കിൽ ചില "ആടയാഭരണങ്ങൾ "കൂടി സഹായിക്കണം എങ്കിലേ പൂർണത വരൂ..
"നവരസ "സിനിമയുടെ പരീക്ഷണം നമ്മുടെ ജയരാജ് എന്ന പ്രഗൽഭ സംവിധായകൻ വർഷങ്ങൾക്കു മുൻപ് തുടങ്ങിയതാണ് .അദ്ദേഹം ഒരു സിനിമ പൂർണമായും ഒരു "രസ"ത്തിൽ എടുത്ത് കൊണ്ടാണ് ചെയ്യുന്നത്.അത് കൊണ്ട് തന്നെ എല്ലാ രസങ്ങളുടെയും ചിത്രങ്ങൾ പൂർത്തിയായിട്ടില്ല.
നവരസ എന്ന പേരിൽ ആ ഒൻപത് രസങ്ങളുടെ കഥയാണ് മണിരത്നവും കൂട്ടരും ഒരുക്കിയിരിക്കുന്നത്.അതിൽ ഹാസ്യം,ബീഭത്സം,രൗദ്രം എന്നിവ ഒട്ടു മിക്കവർക്കും ഇഷ്ടപ്പെടും.മറ്റു രസങ്ങളുടെ കഥ എല്ലാവർക്കും ഇഷ്ടപ്പെടണം എന്നില്ല. അത് ഓരോരുത്തരുടെയും ടേസ്റ്റ് പോലെ അനുഭവപ്പെടും .
അതാണ് മുൻപേ പറഞ്ഞ
" ആടയാഭരണങ്ങളും "മറ്റും സപ്പോർട്ട് ചെയ്യുവാൻ പറ്റാത്തത് കൊണ്ടുള്ള അപൂർണ്ണത.
മലയാളത്തിൽ കേരള കഫെ തുടങ്ങി ഇടക്കിടക്ക് ഇത്തരം കുഞ്ഞു കുഞ്ഞു കഥകൾ കൊണ്ട് ചിത്രങ്ങൾ ഉണ്ടാകാറുണ്ട്.പക്ഷേ തമിഴിൽ ഈ അടുത്ത കാലം മുതലാണ് ഇങ്ങനത്തെ ചിത്രങ്ങൾ ഉണ്ടായത് എന്നു തോന്നുന്നു. ഈ മഹാമാരി കാലത്ത് കാണുന്ന നാലാമത്തെ തമിഴു ചിത്രമാണിത്.
സൂര്യ,വിജയ് സേതുപതി,പ്രകാശ് രാജ്,രേവതി,അരവിന്ദ് സ്വാമി,സിദ്ധാർത്ഥ്,പാർവതി തിരുവോത്ത് എന്നീ കാലം തെളിയിച്ച പ്രതിഭകൾ ഉണ്ടായാലും അവരുടെ ചിത്രങ്ങളെക്കാളും നവരസയിൽ കയ്യടി നേടുന്നത് മറ്റു ചില അഭിനേതാക്കളുടെ "രസങ്ങൾ " തന്നെയാണ്.
സിദ്ധാർത്ഥ്, ഡൽഹി ഗണേഷ, രേവതി,യോഗി ബാബു,നെടുമുടി വേണു,മണി കുട്ടൻ,രമ്യ നമ്പീശൻ,പ്രയാഗ മാർട്ടിൻ,കാർത്തിക് സുബ്ബരാജ്, ബിജോയ് നമ്പ്യാർ,കാർത്തിക് നരേൻ,പ്രസന്ന,പ്രിയദർശൻ,
ഗൗതം മേനോൻ,വസന്ത് ,
മണി രത്നം,AR റഹ്മാൻ ,കാർത്തിക് ,തുടങ്ങി തെന്നിന്ത്യൻ സിനിമയിലെ കുറെ പേരുടെ ത്യാഗം തന്നെയാണ് ഈ ചിത്രം .
കോവിടിൻ്റെ കൈപ്പിടിയിൽ പെട്ട് ഉപജീവനം നഷ്ടപ്പെട്ടു പോയ സിനിമാ രംഗത്തെ സഹപ്രവർത്തകരായ പതിനായിരങ്ങൾക്ക് വേണ്ടിയാണ് ഈ സിനിമ. ഇതിൻ്റെ ലാഭം കൊണ്ട് അതിജീവിക്കുവാൻ പോകുന്നത് തമിൾ സിനിമ കൂടിയാണ്. അത് കൊണ്ട് തന്നെ നവരസങ്ങൾക്കു മാധുര്യം കുറഞ്ഞാൽ പോലും അത് നമ്മൾ തീർച്ചയായും ആസ്വദിക്കണം.അത് നമുക്ക് ചുറ്റിലും ജീവിക്കുന്ന കലാകാരന്മാർക്ക് നമ്മൾ കൊടുക്കുന്ന ഒരു ആദരം കൂടിയാണ്
പ്ര. മോ. ദി. സം
No comments:
Post a Comment