സൂര്യവംശി

 

"ഞാൻ മുസ്ലിം ആയത് കൊണ്ടല്ലേ എന്നെ നിങൾ പിടികൂടിയത്"?

"പോലീസ് പാസ്പോർട്ട് നോക്കിയല്ല അറസ്റ്റ് ചെയ്യുന്നത് ക്രൈം നോക്കിയാണ്"

ഇങ്ങിനെ ചിലരെ കോരിത്തരിപ്പിക്കുന്ന കുറെ സംഭാഷണങ്ങൾ കൊണ്ടുള്ള അക്ഷയ്കുമാർ ചിത്രമാണ് സൂര്യ വംശി.

ഇപ്പൊൾ നമ്മുടെ രാജ്യത്ത് തെണ്ടിത്തരം ചെയ്തിട്ട് ആൾകാർ രക്ഷപെടുവാൻ ഉപയോഗിക്കുന്ന വാക്കാണ് ന്യൂനപക്ഷ പ്രീണനവും മറ്റും.. സൂര്യവംശി എന്ന ചിത്രത്തിൽ രോഹിത് ഷെട്ടി പറഞ്ഞുവെക്കുന്നതും ഇതൊക്കെ തന്നെയാണ്. ഉള്ള ചെറ്റത്തരം തെണ്ടിത്തരം രാജ്യദ്രോഹം ഒക്കെ ചെയ്തിട്ട് മതത്തിൻ്റെ പേരിൽ രക്ഷപ്പെടുവാൻ ശ്രമിക്കുക. അതൊക്കെ വെറും തോന്നൽ ആണെന്ന്  അവരെ മനസ്സിലാക്കി നായകൻ പൊളിച്ചടുക്കി കൊടുക്കുന്നുണ്ട് .അങ്ങിനെ സമൂഹത്തിൽ നിലവിൽ ഉള്ള കുറെ കാര്യങ്ങളിൽ കൂടി തന്നെയാണ് ചിത്രം സഞ്ചരിക്കുന്നത്.

 

ലോജിക് ഒക്കെ മടക്കി തിരുകി പോക്കറ്റിൽ വെച്ചിട്ട് വേണം പല ഹിന്ദി സിനിമകളും കാണുവാൻ..പ്രത്യേകിച്ച് രോഹിത് ഷെട്ടി സിനിമകൾ..ക്രൈം ആയി കൊട്ടെ ഹാസ്യം ആവട്ടെ പ്രേമം ആകട്ടെ അത് ഒന്നും നമ്മളെ ചിന്തിക്കാൻ വിടാതെ എൻ്റർ ടൈൻ ചെയ്യിക്കുക എന്നതാണ് രോഹിത്തിൻ്റെ പോളിസി..അത് കൊണ്ട് തന്നെ ആവണം ഹിറ്റ് മേക്കറെന്ന പേരിൽ വർഷങ്ങളായി അദ്ദേഹം വിലസുന്നത്.

ആദ്യാവസാനം അക്ഷയ കുമാറിൻ്റെ ഷോ ആണെങ്കിലും സെവാഗും ഗംഭീറും സച്ചിനും യുവരാജും ഒക്കെ അടിത്തറ ഇട്ട ഇന്നിങ്സിൽ അവസാനം ധോണി വന്നു ഫിനിഷ് ചെയ്തു പെരെടുക്കുന്നത് പോലെ അജയ് ദേവ്ഗൺ ആണ് അവസാന ഇരുപത് മിനുട്ടിൽ തകർക്കുന്നത്.

സിങ്കം,സിമ്പ ചിത്രങ്ങളിലൂടെ പോലീസ് വേഷം  ഹിന്ദി മനസ്സിൽ കയറ്റിയ അജയ് ദേവ്ഗൺ ,രൺവീർ സിംഗ് എന്നിവർ  അതേ കഥാപാത്രമായി സൂര്യവംശിയെ സഹായിക്കുവാൻ എത്തുന്നുണ്ട്.അത് കലക്ഷനെയും നന്നായി സഹായിച്ചിട്ടുണ്ട്..അത് കൊണ്ടാകും ഈ വർഷം ഏറ്റവും കൂടുതൽ ആൾകാർ കണ്ട ചിത്രമായി ഇത് മാറിയതും.

നമ്മുടെ സംയുക്ത സൈനിക മേധാവി അന്തരിച്ചപ്പോൾ അദ്ദേഹത്തിൻ്റെ മരണം പോലും ആഘോഷിച്ച "വിമത ഇന്ത്യൻസ്" മറക്കുന്നത് ഇവിടത്തെ സംസ്കാരവും കൂട്ടായ്മയും മതേതരം ഒക്കെ ആണ്.

 നമ്മുടെ കൂടി സകല ആനുകൂല്യവും നക്കി തിന്നു ജീവിക്കുന്ന  "വിമതരായ  വാലാട്ടി രാജ്യ ദ്രോഹികൾ' ഉള്ള ഈ നാട്ടിൽ ഇത് പോലെയുള്ള ചിത്രങ്ങളിൽ കൂടി  പറയാനുള്ളത് അവരുടെ മുഖത്ത് നോക്കി തന്നെ ചിലർ പറഞ്ഞു വെക്കുന്നുണ്ട് എന്നത് തന്നെയാണ് വമ്പിച്ച താരനിര ഉണ്ടായിട്ടും വലിയ  പുതുമയും ഒന്നും അവകാശപ്പെടാനില്ലാത്ത ഈ ചിത്രത്തിൻ്റെ പ്രാധാന്യവും.

പ്ര. മോ. ദി .സം

ഭീമൻ്റെ വഴി

 

വഴി വലിയൊരു പ്രശ്നം തന്നെയാണ്..നേരായ ഒരു വഴി ഇല്ലെങ്കിൽ നമ്മൾ ഒക്കെ തെറ്റിയ വഴിയിൽ കൂടി പോയി അപകടത്തിൽ ചെന്ന് ചാടിയേക്കും. തടസ്സം നിൽക്കുന്ന വഴികൾ  നമ്മുടെ ജീവിതത്തെ എപ്പൊഴും അലട്ടി കൊണ്ടിരിക്കുകയും ചെയ്യും.

അമ്മയെ വയ്യാതെ ആശുപത്രിയിൽ കൊണ്ടുപോകുവാൻ ബുദ്ധിമുട്ടിയ അവസരത്തിൽ ആണ് ഭീമൻ എന്ന് വിളിപ്പേരുള്ള നായകൻ  പുരയിടത്തിലെക്കുള്ള വഴിയേ കുറിച്ച് ചിന്തിക്കുന്നത്. കഷ്ടപ്പെട്ടു തുടങ്ങുമ്പോൾ  നമ്മൾ  മുൻപ് സഞ്ചരിച്ച വഴികളെ കുറിച്ച് ഓർമിക്കുന്നു. ദുർഘടമായ വഴികളിൽ നിന്നും മാറി നടക്കുവാൻ ഉത്സാഹിക്കും..

അങ്ങിനെ  നല്ല ഒരു വഴി ആവശ്യമുള്ളവർ ഒക്കെ ഒത്തുകൂടി  തങ്ങളുടെ പുരയിടങ്ങളിൽ പോകുവാൻ പുതു വഴി നിർമ്മിക്കുവാൻ ഒത്തുചേരുന്നു.തങ്ങളുടെ ഭൂമിയും അധ്വാനവും കൊണ്ട്  പുതു വഴി ഉണ്ടാക്കുമ്പോൾ നേരിടുന്ന പ്രശ്നങ്ങൾ ആണ് സിനിമ.

വഴിമുടക്കികൾ എവിടെയും ഉണ്ടാകുമല്ലോ..അങ്ങിനെ ഉള്ള പല പ്രശ്നങ്ങൾ  ചിന്തകള് ഹാസ്യവും ഗൗരവവും ചേർത്ത് എഴുതുകയാണ് ചെമ്പൻ വിനോദ് എന്ന നടൻ.അദ്ദേഹം മനസ്സിൽ കണ്ടത് അക്ബർ ഹംസ എന്ന സംവിധായകൻ  മികച്ചൊരു സിനിമയും ആക്കി നമ്മളോട് സംവദിക്കുന്നു.

തമാശ എന്ന ചിത്രത്തിലൂടെ തൻ്റെ വരവ് അറിയിച്ച അക്ബർ ഈ ചിത്രത്തിലൂടെ തൻ്റെ ടാലൻ്റ് തെളിയിക്കുന്നു .നിവിൻ പോളിയുടെ പുതിയ ചിത്രത്തിലെ റിസപ്ഷനിസ്റ്റ് ആരെന്ന് തിരക്കിയപ്പോൾ പലർക്കും അറിയില്ലായിുന്നു.വിൻസി അലോഷിയസ് എന്ന  ആ നടി ഇതിലൂടെ കൂടുതൽ ഉയരത്തിൽ എത്തിയിരിക്കുന്നു.

ജിനു ജോസഫ് എന്ന നടൻ്റെ എറ്റവും മികച്ച വേഷമാണ് കരിയറിലെ തന്നെ എന്നുറപ്പിക്കാം.ആദ്യാവസാനം പുതു പണക്കാരനായ അദേഹം ഞെട്ടിക്കുന്നു.നസീർ സംക്രാന്തി എന്ന നടനും നല്ലൊരു ബ്രേക്ക് കിട്ടിയേക്കും.

ചോക്കളേറ്റ് ഇമേജ് മാറ്റി കോഴി ഇനത്തിലേക്ക് മാറിയുള്ള കുഞ്ചാക്കോവും പതിവ് ലൈൻ തെറ്റിക്കുന്നു. സെക്സും മദ്യവും ആണ് കൂടുതൽ കിക്ക് തരിക എന്നുകൂടി കുഞ്ചാക്കോ പറയുന്നുണ്ട്.അഭിനയിച്ച ഓരോരുത്തരും തങ്ങളുടെ കഴിവുകൾ മാക്സിമം പ്രകടിപ്പിച്ചിട്ടുണ്ട്.

വലിയ ചിത്രങ്ങളുടെയും മറ്റും തിയേറ്റർ നിറക്കലുകൾ ഈ കൊച്ചു ചിത്രത്തെ ബാധിക്കില്ല എന്നുറപ്പ് വരുത്തുവാൻ നമ്മൾ ഈ ചിത്രം വലിയ പ്രതീക്ഷകൾ ഇല്ലാതെ കാണുക തന്നെ വേണം.

പ്ര. മോ. ദി .സം

ആകാശവാണി

ജീവിതത്തിൽ വിദ്യാഭ്യാസം, അറിവുകൾ ഒക്കെ തന്നെ  അഭിവാജ്യഘടകം തന്നെയാണ്.വിദ്യാഭ്യാസത്തിന് സാഹചര്യം ഇല്ലെങ്കിൽ നമ്മുടെ നാടിനെ കുറിച്ച് ചുറ്റുപാടുകളെ  കുറച്ചു അറിവുകൾ എവിടെ നിന്നെങ്കിലും ഒരാള് തീർച്ചയായും സമ്പാദിക്കണം.അതില്ലെങ്കിൽ നമ്മളെ ചൂഷണം ചെയ്യുവാൻ ആയിരങ്ങൾ ഉണ്ടാകും.

ആദിവാസികളും മറ്റു ഗോത്ര വർഗകാരും ഒക്കെ ചൂഷണത്തിന് ഇരയാകുന്നത് ഈ ഒരു മുഖ്യ കാരണം അറിവില്ലായ്മ തന്നെയാണ്. കൂടുതൽ അറിവുകൾ ഉണ്ടെന്ന് ഭാവിക്കുന്ന നമ്മൾ പോലും അറിയാതെ ചൂഷണത്തിന് വിധേയരാകുന്നു.

ദിവസേന ഉള്ള പത്രങ്ങൾ  മറ്റു വാർത്തകൾ നോക്കിയാൽ നോർത്ത് ഇന്ത്യയിൽ  മറ്റു സംസ്ഥാനങ്ങളിൽ കണ്ണും നട്ട് നോക്കിയിരിക്കുന്ന മാമ മാധ്യമങ്ങളുടെ അനുഭവ കുറിപ്പുകൾ കാണാം..അവിടെ വിദ്യാഭാസമില്ലാത്തത് കൊണ്ട് ചൂഷണം അനുഭവിക്കുന്നവരുടെ അവസ്ഥകൾ ഫോട്ടോ സഹിതം കാണാം.

എന്നാല്   വിവരവും വിദ്യാഭ്യാസവും കൂടുതലായുള്ള നമ്മുടെ തൊട്ടു

 അപ്പുറത്ത് വയനാട്ടിലെ അല്ലെങ്കിൽ അട്ടപ്പാടിയിലെ കാര്യങ്ങൽ  വിവാദം ആയില്ലെങ്കിൽ അവർ  നമ്മൾ "നമ്പർ ഒന്നായത്" കൊണ്ട് പുറത്തറിയിക്കാതെ  മുക്കും..പറഞ്ഞു വരുന്നത് ചൂഷണ വർഗ്ഗവും ചൂഷിതരും നമുക്ക് ചുറ്റും ഉണ്ട് അത് "മറ്റുള്ളവർ" ഭരിക്കുന്ന സംസ്ഥാനങ്ങളിൽ മാത്രമല്ല.അധികാരത്തിൻ്റെ അപ്പകഷ്ണം കിട്ടിയാൽ മനുഷ്യൻ്റെ വിധം മാറും.

ഇല്ലാത്ത കാര്യങ്ങൽ ഉണ്ടെന്ന് കാട്ടി " തള്ളി" മറിക്കുന്നത് കൊണ്ടാണ് നമ്മൾ മറ്റു നാട്ടുകാർക്ക് മുന്നിൽ അപഹാസ്യരായി പോകുന്നത്..ഇപ്പൊൾ മറച്ചു വെച്ച കൊവിഡ് കണക്കുകൾ പോലും മറനീക്കി പുറത്ത് വരുന്നതും ആനുകൂല്യം കിട്ടുമെന്ന് അറിഞ്ഞപ്പോൾ  മരണ കണക്കിലേക്ക്  അവയൊക്കെ നുഴഞ്ഞു കയറുന്നത് ഒക്കെ ഭരിക്കുന്നവരുടെ ഈ "വിവരമില്ലായ്മ" കൊണ്ടുതന്നെയാണ് . എന്തും വിശ്വസിക്കുന്ന  അണികൾ  ആയ അടിമകൾ ഉള്ളപ്പോൾ ഭരികുന്നവർക്ക് അവരുടെ കണ്ണിൽ പൊടിയിടാൻ പ്രയാസമില്ല.പ്രചരിപ്പിച്ചു മറ്റുള്ളവരെ വിശ്വസിപ്പിക്കുവാനും

ഇതുപോലെ അടിമകൾ ആയി ജീവിക്കുന്ന ഒരു കാട്ടിലെ ഗോത്രവർഗ കഥയാണ് ആകാശവാണി .ദൈവം ഉണ്ടെന്ന് വിശ്വസിക്കുകയും അത് അബദ്ധത്തിൽ കിട്ടുന്ന "റേഡിയോ" ആണെന്ന് പോലും കരുതുന്ന നിഷ്കളങ്കരൂടെ കഥയും അവരെ ചൂഷണം ചെയ്യുന്ന മുതലാളി മാരുടെയും കഥയാണ് ഇത്.

നമ്മെ അടിമകൾ ആയി ഭരിക്കന്ന ഭരണവർഗത്തിൻ്റെ ചൂഷണങ്ങൾ നല്ല രീതിയിൽ പകർത്തിയ മൊഴിമാറ്റ തെലുഗു സിനിമ എല്ലാവരെയും തൃപ്തി പ്പെടുത്തണം എന്നില്ല എങ്കിലും നമ്മുടെ സമൂഹത്തിന് നേരെ പിടിക്കുന്ന മികച്ചൊരു കണ്ണാടി തന്നെയാണ്.

പ്ര .മോ .ദി. സം

ചിത്തിരയ് ശെവ്വനം

 

സമുദ്രക്കനി മികച്ച ഒരു ക്യാരക്ടർ നടനാണ്..തൻ്റേതായ പ്രകടനത്തിലൂടെ സിനിമയെ ഒറ്റയ്ക്ക് താങ്ങി മുന്നോട്ട് കൊണ്ടു പോകും.അത് കൊണ്ട് തന്നെ സൗത്ത് ഇന്ത്യൻ ഭാഷകളിൽ തിളങ്ങി നിൽക്കുന്നു.പക്ഷേ ഇപ്പൊ ഒ ടി ടീ റിലീസ് സിനിമകളിൽ കുറെയേറെ ചിത്രങ്ങൾ സമുദ്രക്കനി നായകനായി വന്നു എങ്കിലും ഒന്നിലും അദ്ദേഹത്തിന് എന്തെങ്കിലും ചെയ്യുവാൻ ഉള്ളതായി തോന്നുന്നില്ല.

പ്രകാശ് രാജ്,രഘുവരൻ ഒക്കെ പോയതുപോലെ ഒരേ മാസ്മറിസം കൊണ്ട് മുന്നോട്ടെക്കു പോകുന്നത് പോലെ..നീതിക്ക് വേണ്ടി പോരാടുന്ന സാധാരണക്കാരൻ ആയി ഇത് ഒരു കൊട്ട സിനിമകൾ ആയി.

സോഷ്യൽ മീഡിയ നമുക്ക് ഇരുതല മൂർച്ചയുള്ള വാൾ ആണ്.സൂക്ഷിച്ചു ഉപയോഗിച്ചില്ല എങ്കിൽ പണി കിട്ടും.ഇപ്പോള് അത് ഗുണത്തെക്കാൾ കൂടുതൽ ദോഷം ചെയ്തിരിക്കുന്നു.

നീറ്റ് പരീക്ഷക്ക് തയ്യാറെടുക്കുന്ന പെൺകുട്ടിയുടെ കുളിസീൻ സോഷ്യൽ മീഡിയയിൽ പ്രചരിച്ചതോടെ ആ കിട്ടി അപ്രത്യക്ഷമാകുന്നു .പിന്നാലെ അതിനു പിന്നിൽ പ്രവർത്തിച്ച ആൾക്കാരും..കുട്ടിയുടെ അച്ഛനും പോലീസും സമാന്തരമായി നടത്തിയ അന്വേഷണത്തിൽ ഞെട്ടിക്കുന്ന സംഭവങ്ങൾ പുറത്ത് വരുന്നതാണ് സ്റ്റണ്ട് സിൽവ അദ്യമായി സംവിധാനം ചെയ്യുന്ന ചിത്രം പറയുന്നത്.

കഥക്ക് ,പുതുമയുള്ള അവതരണത്തിന് ഒന്നിനും സ്കോപെ ഇല്ലാത്ത ഈ ചിത്രം ഉള്ള സമയത്തിൽ തന്നെ കൂടുതൽ ലാഗ് സൃഷ്ടിച്ചു കൊണ്ട് നല്ല രീതിയിൽ പ്രേക്ഷകരെ വലക്കുനുണ്ട്.നമ്മുടെ റിമ കല്ലിങ്കൽ പോലീസ് ഉദ്യോഗസ്ഥയായ വെറുപ്പിക്കൽ കൂടി ആകുമ്പോൾ ശരിക്കും പെട്ട്പോകുന്നുണ്ട്.

പ്ര .മോ .ദി .സം

മരക്കാർ.. അറബിക്കടലിൻ്റെ സിംഹം

 

വിലപിടിപ്പുള്ള ഒരു വണ്ടി രണ്ടു കൊല്ലമായി ഓടിക്കാത്തത് കൊണ്ട് അതിനു മുതൽ മുടക്കിയവർ രണ്ടു വർഷം അതിൻ്റെ ഗുണകണങ്ങൾ "തള്ളി തളളി" വല്യ കയറ്റത്തിൽ എത്തിക്കുന്നു..പക്ഷേ" പിടി" വിട്ട് പോകുന്ന വണ്ടി താഴെ എത്തിയപ്പോൾ ആണ് ആൾക്കാർക്ക് മനസ്സിലാകുന്നത് ഇത്രയും തള്ളി കയറ്റിയത് കൊണ്ടാണ് "പിടിവിട്ടു 'പോയത് എന്ന്.

രണ്ടു മൂന്നു വർഷം മുൻപ് ഒടിയൻ എന്ന ചിത്രത്തിന് തള്ളി ഹൈപ്പ് ഉണ്ടാക്കിയത് കൊണ്ട് എന്ത് സംഭവിച്ചു അത് മാത്രമാണ് "മരക്കാർ "എന്ന സിനിമക്കും സംഭവിച്ചത്..രണ്ടും പാണന്മാർ പാടി നടക്കുന്നത് പോലെ മോശം സിനിമ ഒന്നുമല്ല..കാണാൻ കൊള്ളാവുന്ന സിനിമകൾ തന്നെയാണ്..രണ്ടും ഇത്രക്ക് ഡീഗ്രേഡ് ചെയ്യണ്ട സിനിമയും അല്ലായിരുന്നു.

മരക്കാർ ആണെങ്കിൽ മലയാള സിനിമയിൽ ഇത് വരെ കാണാത്ത ദൃശ്യ വിസ്മയം തന്നെയാണ്..തിരക്കഥയിൽ ഉണ്ടായ പോരായ്മയും മിസ് കാസ്ററിങ്ങും ചിത്രത്തെ വലിയ തോതിൽ ബാധിച്ചിട്ടുണ്ട്.തൻ്റെ സുഹൃത്ത് ബന്ധത്തിൽ ഉള്ളവരെ മുഴുവൻ അഭിനയിപ്പിക്കാൻ ശ്രമിച്ചാൽ വലിയ ദുരന്തങ്ങൾ ഉണ്ടായേക്കും എന്ന് മുഖ്യ അണിയറക്കാർ മനസ്സിലാക്കണം.

ഹരീഷ് പേരടി,സിദ്ദിഖ്,അർജുൻ,പ്രണവ് എന്നിവർ  മാത്രമാണ് പാത്രസൃഷ്ട്ടിയിൽ  നീതി പുലർത്തിയത്.ലാലേട്ടൻ പോലും പല രംഗങ്ങളും  അർധമനസ് കൊണ്ട് അഭിനയിച്ചത് പോലെ തോന്നി.

പുലിമുരുകൻ പോലെയോ ലൂസിഫർ പോലെയോ   അർദ്ധരാത്രി ഷോ കളിച്ചാൽ 

എല്ലാവർക്കും രസിക്കണം എന്നുമില്ല..ഉറക്കച്ചുവട് മറികടന്ന് സിനിമ കാണുവാൻ എത്തുന്നവർക്ക് രസിക്കുന്ന സബ്ജക്ട് അല്ല ചരിത്രം ..മൂന്ന് മണിക്കൂർ സമയവും കുറെ "മെല്ലെ പോക്കും" കൂടാതെ പല സമയത്തും അലോരസപെടുത്തുന്ന പാശ്ച ത്തല സംഗീതം കൂടിയായപ്പോൾ പ്രേക്ഷകർ സഹികെട്ട് പോയിരിക്കും .ഗാനങ്ങൾ ഒക്കെ അടിപൊളി തന്നെയാണ്.

പകൽ സമയത്ത് കണ്ടവർ നല്ലവണ്ണം ആസ്വദിച്ച സിനിമ തന്നെയാണ് അർദ്ധരാത്രി പലരും തെറി വിളിച്ച ഈ സിനിമ.

അധികം പ്രതീക്ഷകൾ ഇല്ലാതെ ഹരിഹരനും എംടീ യുമല്ല ഇതിൻ്റെ പിന്നിൽ എന്നും കാലാപാനി മാത്രമല്ല കടത്തനാടൻ അമ്പാടി സംവിധാനം ചെയ്തതും പ്രിയദർശൻ ആണെന്ന് വിചാരിച്ചു പോയാൽ നല്ലവണ്ണം മരക്കാരിൽ ലയിക്കാം.

പ്ര .മോ .ദി .സം

ആഹാ

 

ജീവിതത്തിൻ്റെ കഷ്ടപ്പാടിനോടും കാഠിന്യത്തോടും പടപൊരുതുന്നവരുടെ ഇഷ്ടവിനോദം ആയിരിക്കും വടം വലി..അവർ ഇവിടെയും പൊരുതുകയാണ് ജീവിതത്തിൽ എന്നെങ്കിലും ഒരിക്കൽ വിജയിക്കാൻ വേണ്ടി..

അങ്ങിനെ കുറെ പച്ച മനുഷ്യരുടെ കഥ പറയുകയാണ് നവാഗതനായ ബിബിൻ പൗൾ സാമുവൽ എന്ന സംവിധായകൻ.ഇദ്രജിത്,അശ്വിൻ കുമാർ,മനോജ് k ജയൻ,അമിത് ചക്കലക്കൾ,ശാന്തി എന്നിവർ കഥാപാത്രങ്ങൾക്ക് നൽകിയ ഊർജം തന്നെയാണ് രണ്ടര മണിക്കൂറോളമുള്ള ചിത്രത്തെ ത്രിൽ അടിപ്പികുന്നത്.

പതിനഞ്ച് വർഷം കേരളത്തിൽ അങ്ങോളം വിജയിച്ച" ആഹാ" എന്ന വടംവലി ടീം അവിചാരിതമായി തോൽക്കുമ്പോൾ ആ ടീം തന്നെ ഇല്ലാതായി പോകുന്നു.വീണ്ടും ഇരുപത് വർഷങ്ങൾക്കിപ്പുറം പുതിയ ടീം ഉണ്ടാകുന്നതും അവർ നിലനിൽപ്പിനായി ആഹാ യുടെ പേര് നിലനിർത്തുവാൻ പരിശ്രമിക്കുന്നത് ആണ് ചിത്രം പറയുന്നത്.

വടംവലി പാശ്ചാത്തലത്തിൽ പല സിനിമകളും കടന്നു പോകുന്നു എങ്കിലും അതിലെ വന്യതയും അഴകും ത്രില്ലും ഒക്കെ നമ്മളിലേക്ക് ആവാഹിക്കുന്ന നല്ലൊരു ഇമോഷണൽ ഡ്രാമ തന്നെയാണിത്.

വടംവലി എന്ന കായികത്തോടൊപ്പം നല്ലൊരു കുടുംബ കഥ കൂടി ഇഴുകി ചേരുന്നത് കൊണ്ട് കുടുംബ സദസ്സുകളിൽ പോലും ചിത്രം നേട്ടം ഉണ്ടാക്കും..എന്നാലും വമ്പൻ ചിത്രങ്ങൾ എന്ന് പറഞ്ഞു ചില ചിത്രങ്ങൾ തിയേറ്റർ നിറക്കുമ്പോൾ ഇതുപോലത്തെ കുഞ്ഞു നല്ല ചിത്രങ്ങൾ തഴയപ്പെട്ട് പോകുന്നത് മലയാള സിനിമക്ക് നല്ലതല്ല.

പ്ര .മോ .ദി .സം

എല്ലാം ശരിയാകും

 

കുടുംബത്തെ മറന്ന് രാഷ്ട്രീയം കളിക്കുന്നവർ ഈ ചിത്രം ഒന്ന് പോയി കാണണം.പക്ഷേ ഈ കാലത്ത് അങ്ങിനെ ഉളളവർ വളരെ കുറവായത് കൊണ്ടു തന്നെ സമൂഹത്തിന് വലിയ ഗുണം ഒന്നുമില്ല അവർക്ക് മാറി ചിന്തിക്കാം എന്ന് മാത്രം.

ഇപ്പൊൾ രാഷ്ട്രീയം പലർക്കും ഒരു തൊഴിൽ ആണ് ..തൻ്റെ ഭാവി ജീവിതം സുരക്ഷിതമായ രീതിയിൽ കൊണ്ട് പോകുവാൻ  മാത്രം ഉള്ള ഒരു മേഖല.അത് കൊണ്ട് തന്നെയാണ് ഇപ്പൊൾ ജാഥകൾ സമ്മേളനങ്ങൾ ഒക്കെ വലിയ ജന പിന്തുണ ഇല്ലാതെ നടത്തേണ്ടി വരുന്നത്.

കേരളത്തിൻ്റെ മുഖ്യമന്ത്രിപദം ജീവിത അഭിലാഷമായി കണ്ടു കുടുംബത്തെ മറന്ന്  പ്രതീക്ഷയോടെ പാർട്ടിയെ നയിച്ച നേതാവിന് ഒരിക്കലും ആവശ്യ സമയത്ത് കുടുംബത്തിലെ നാഥൻ ആകുവാൻ പറ്റുന്നില്ല. തൻ്റെ മകൾ പോലും എതിർ പാർട്ടികാരനെ സ്നേഹിച്ചു പടിയിറങ്ങി പോയിട്ടും ഒന്നും കൂസാത്ത അയാള് തൻ്റെ ജീവിത അഭിലാഷം നിറവേറ്റാൻ തന്നെ  കരുക്കൾ നീക്കുന്നു.അതിനിടയിൽ രാഷ്ട്രീയത്തിലും കുടുംബത്തിലും നടക്കുന്ന സംഭവങ്ങൾ ആണ് ചിത്രത്തെ മുന്നോട്ട് കൊണ്ടു പോകുന്നത്.

അടുത്ത കാലത്ത് കേരളത്തെ നടുക്കിയ ദുരഭിമാന കൊല കൂടി രാഷ്ട്രീയ കുടുംബ ചിത്രത്തിൽ ചേർത്ത് കൊണ്ടാണ് ജിജു ജക്കബ് ചിത്രം ഒരുക്കിയിരിക്കുന്നത്..

കമ്മ്യുണിസ്റ്റ് പാർട്ടിയെ തല്ലിയും തലോടിയും ഒരുക്കിയ തിരക്കഥ കോൺഗ്രസ്സ് പ്രസ്ഥാനത്തിൻ്റെ പിടിപ്പു കേടും ചൂണ്ടി കാണിക്കുന്നുണ്ട്. നല്ല ഒരു കമ്മ്യുണിസ്റ്റ് എങ്ങിനെ ആയിരിക്കണം എന്ന് കൂടി ചിത്രം ഓർമപ്പെടുത്തുന്നു .

ചോദ്യങ്ങൾ ചോദിച്ചു കൊണ്ടിരിക്കുവൻ ആണ്  ലെനിൻ പഠിപ്പിച്ചത് എങ്കിലും ഇപ്പോഴത്തെ നേതാക്കൾ ചോദ്യങ്ങളിൽ അസഹിഷ്ണുത പ്രകടിപ്പിക്കുന്നതും ചൂണ്ടി കാണിച്ചിട്ടുണ്ട്.കേ ആർ ഗൗരിയമ്മ യുടെ മുഖ്യമന്ത്രി കസേര പാര പണിയിലൂടെ തെറിപ്പിച്ചത് കൂടി ഒരവസരത്തിൽ പറയുന്നുണ്ട്.

ഔസേപ്പചചൻ്റെ നല്ല പാട്ടുകളും അഭിനയത്തിൽ ഒരു കൈ നോക്കുകയും ചെയ്യുന്ന ചിത്രം വെറും രാഷ്ട്രീയ ചിത്രമല്ല..രാഷ്ട്രീയത്തിലൂടെ നല്ലൊരു കുടുംബ കഥ പറയുകയാണ്.കുറുപ്പും കാവലും അരങ്ങ് വാഴുകയും കുഞ്ഞാലി മരക്കാർ എത്തുകയും ചെയ്യുമ്പോൾ  എത്രമാത്രം ഈ കൊച്ചു ചിത്രത്തിന് പിടിച്ച് നിൽക്കാൻ കഴിയും എന്നതാണ് പ്രശ്നം.

"എല്ലാം ശരിയാകും" എന്ന അണിയറകാരുടെ വിശ്വാസം ചിത്രത്തെ വിജയിപ്പിക്കട്ടെ....

പ്ര. മോ. ദി. സം