ജയിംസ്

 

കന്നഡ സിനിമ ആരും പ്രതീക്ഷിക്കാത്ത തരത്തിൽ മുന്നേറി പോകുകയാണ്.ആദ്യം കർണാടകയിൽ മാത്രം ഒതുങ്ങിയ റീലീസ്  ഇപ്പൊൾ ലോകം മുഴുവൻ വ്യാപിക്കുകയാണ്.

പുനീതിൻ്റെ അവസാന ചിത്രങ്ങളിൽ ഒന്നായ ജയിംസ് എന്തിന് ഒരു പാൻ ഇന്ത്യൻ ചിത്രമായി റീലീസ് ചെയ്തത് എന്തുകൊണ്ട് എന്ന് മനസ്സിലാകുന്നില്ല.

കാരണം ലോക റീലീസ് നടത്തിയ മറ്റു കന്നഡ ചിത്രങ്ങൾ പോലെ ഒരു വൈവിധ്യവും ഈ ചിത്രത്തിൽ  കാണാനില്ല. 

പതിവ് പോലെ മറ്റു ഭാഷാ ചിത്രങ്ങളിൽ കടമെടുത്ത് കൊണ്ട് കന്നഡ സിനിമ മുൻപേ കാണിച്ചത് പോലെ ഉള്ള ഒരു പരിപാടി.

വിജയ് ചിത്രങ്ങളുടെ പാറ്റേണിൽ  ഉള്ള കഥയും സംഭവങ്ങളുമായി ഒരു മസാല ചിത്രം. വിജയിക്ക് പകരം പുനീത് അത് മാത്രമാണ് വ്യത്യാസം...

പ്ര .മോ. ദി. സം

സാറ്റർഡേ നൈറ്റ്

 

ശനിയാഴ്ച രാത്രി എല്ലാവർക്കും പ്രിയപ്പെട്ടതാണ്.. പിറ്റെ ദിവസം അവധി ആയത് കൊണ്ട് തന്നെ ഭൂരിഭാഗം ആൾക്കാരും മാക്സിമം എൻജോയ് ചെയ്യുന്ന രാത്രി.

ചിലർ പബ്ബിൽ പോകും ചിലർ ബാറിൽ ഇരുന്നു ആഘോഷിക്കും ചിലർ പുറത്ത് പോയി ഫുഡ് അടിക്കും ചിലർ സിനിമക്ക് പോകും ചിലർ വീട്ടിൽ തന്നെ ഇരുന്നു ആഘോഷിക്കും. എവിടെ ആയാലും അവധിയുടെ ആലസ്യത്തിൽ മനസ്സിൽ ലഡു പൊട്ടി ഇരിക്കുകയാവും പലരും.

അങ്ങിനെ ഉള്ള ഒരു ശനിയാഴ്ച രാത്രി "നശിച്ചു" പോയാലോ? പിറ്റേന്നത്തെ അവധി ദിവസം പോലും അത് നമ്മെ വേട്ടയാടും..ഇന്നലെ ഈ സിനിമ കണ്ടത് കൊണ്ട് എനിക്ക് അതാണ് സംഭവിച്ചത്.ചിലപ്പോൾ എനിക്ക് മാത്രമാകില്ല.

സൗഹൃദം അത് പരിപാവനമായി കരുതുന്ന ആൾകാർ ഉണ്ട്..സുഹൃത്തുക്കൾക്ക് വേണ്ടി എന്തിനും ഏതിനും മുൻപും പിൻപും നോക്കാതെ ഇറങ്ങി പുറപ്പെടുന്നത് ശീലമാക്കിയ സുഹൃത്തുക്കൾ ഉണ്ട്..മുതലെടുപ്പിന് വേണ്ടി ചങ്ങാത്തം കൂടുന്നവർ ഉണ്ട്..അങ്ങനെയുള്ള കുറെ സൗഹൃദങ്ങളുടെ കഥയാണ് ഇത്.

ചില സംവിധായകരുടെ എല്ലാ സിനിമയും വിടാതെ കാണൂന്ന ആൾകാർ ഉണ്ട്..സത്യൻ അന്തിക്കാട്,കമൽ, വിനീതശ്രീനിവാസൻ ,ലാൽജോസ് എന്നിവരുടെ സ്ഥിരം കാണികൾ ഉണ്ട്..അവരിലുള്ള പ്രതീക്ഷ കൊണ്ട് പോകുന്നവര്..പക്ഷേ ഇതിൽ പലരും ഇന്ന് ഭയങ്കര ഉഴപ്പന്മാരായി പോയി..

അത് പോലെ ആയിരുന്നു പലർക്കും  റോഷൻ ആൻഡ്രൂസും..പക്ഷേ ഈ  സിനിമ വേണ്ടായിരുന്നു..ഇങ്ങിനെ നമ്മളെ കൊല്ലരുതേ റോഷൻ...പല ഇഷ്ട സംവിധായകരുടെയും ചിത്രം ഇപ്പൊൾ അഭിപ്രായം അറിഞ്ഞു മാത്രം കാണാൻ പോകുന്ന പ്രേക്ഷകർക്ക് ഒരു സംവിധായകൻ കൂടി അവരുടെ  സെലക്ഷൻ പട്ടികയിൽ കയറികൂടി.

നിവിൻ ഇനിയെങ്കിലും ശ്രദ്ധിച്ചില്ല എങ്കിൽ നിങ്ങൾക്ക് മലയാള സിനിമയിൽ ഇടം കാണില്ല.. 

കരിയറിലെ  പീക് സമയത്ത് സൈജു കുറുപ്പ് ഒരിക്കലും  മണ്ടത്തരത്തിന് തലവെക്കരുത്.

അജു വർഗീസ് താങ്കളിൽ നിന്നും ഇതൊന്നുമല്ല നമ്മൾ പ്രതീക്ഷിക്കുന്നത്.നിങൾ ഈ കാലത്തെ "അടൂർ ഭാസി" ആണ് എന്നത് മറക്കരുത്.

പത്തൊമ്പതാം നൂറ്റാണ്ടിൻ്റെ സ്റ്റാർ സിജു വിൽസൺ   നിങ്ങളെ മലയാള സിനിമക്ക് ആവശ്യമുണ്ട്..അത് കൊണ്ട് നിങൾ  ഇത്തരം അബദ്ധത്തിൽ ചെന്ന് ചാടരുത്.

കൊറിയകാർ സിനിമ കണ്ട് അഭിപ്രായം പറയില്ല എന്ന് വെച്ച് നമ്മൾക്ക് അഭിപ്രായം പറയാതിരിക്കാൻ പറ്റില്ല..കാരണം നമ്മൾ ഇന്ത്യക്കാർ ആണ്..പ്രതികരിക്കുവാൻ അറിയുന്ന ഇന്ത്യൻസ്.

പ്ര .മോ .ദി. സം

കുമാരി

 

വിശ്വാസങ്ങൾ എല്ലാവർക്കും ഉണ്ടാകും.അത് അന്ധതയിലേക്ക് പോകുമ്പോൾ ആണ് പ്രശ്നങ്ങൾ ഉണ്ടാവുന്നത്.ഇലന്തൂർ നരബലി പിടിക്കപ്പെട്ടത് കൊണ്ട്  കേരളത്തിൽ അങ്ങോളം ഇങ്ങോളം ഉള്ള മന്ത്രവാദികളും  കപട സ്വാമികളും പാസ്റ്റർമാരും ഉസ്താദ്മാരും മറ്റും  വിശ്വാസങ്ങളെ മുതലെടുക്കുന്നത് വാർത്തയായി.

ഇത് ഇന്നും ഇന്നലെയും ആരംഭിച്ചത് അല്ല.മനുഷ്യരുടെ വിശ്വാസങ്ങളെ മുതലെടുത്ത് കൊണ്ട് കീശ വീർപ്പിക്കാൻ അധികാരം ഉണ്ടാക്കുവാൻ  സാധിക്കുന്ന കാലം മുതൽ ഇനിയും പ്രവചിക്കാൻ പറ്റാത്ത കാലത്തോളം ഇത് തുടരും.ഇന്ന് ചില പ്രശ്നങ്ങളുടെ പേരിൽ ഒന്ന് മന്ദതയില് ആയെങ്കിലും പൂർവാ ധികം ശക്തിയോടെ മുതലെടുപ്പ് തുടർന്നും ആരംഭിക്കും.

കുമാരി കയറി ചെന്നതും അപ്പടി അന്ധവിശ്വാസം നിലനിൽക്കുന്ന ഒരു തറവാടിലേക്ക് ആയിരുന്നു. മുൻപ് സംഭവിച്ച ഒരു കുരുതിയുടെ പേരിൽ ശാപം പേറുന്ന തറവാട്ടിൽ ഭ്രാന്തനായി മുദ്ര കുത്തപെട്ട ഭർത്താവിൻ്റെ തണലിൽ അയാളെ തിരികെ ജീവിതത്തിലേക്ക് കൊണ്ടുവന്നു  ജീവിക്കുമ്പോഴും അവള് ചേടത്തി അമ്മയിലൂടെ തറവാടിൻ്റെ ചരിത്രം അറിയുകയായിരുന്നു .

ഇടക്കിടക്ക് അപമൃത്യു സംഭവിക്കുന്ന തറവാടിൻ്റെ അവസ്ഥയുടെ കാരണങ്ങൾ അവള് ചികയുമ്പോൾ പല മുൻ സംഭവങ്ങളും ഞെട്ടലോടെ മനസ്സിലാക്കുന്നു.

തൻ്റെ ജനിക്കുവാൻ പോകുന്ന കുഞ്ഞിനെ ബലി കൊടുത്തു മാത്രമേ തറവാടിൻ്റെ രക്ഷ സാധ്യമാകൂ എന്ന തിരിച്ചറിവിൽ അവള് മറ്റൊരാളായി മാറുകയാണ്.

കുറച്ചു മുൻപുള്ള കാലഘട്ടത്തിൽ ഉള്ള കഥ പറയുന്നത് കൊണ്ട് തന്നെ ആ കാലവുമായി ഇണക്കി ചേർക്കുവാൻ സംവിധായകൻ നന്നേ പരിശ്രമിച്ചിട്ടുണ്ട്.

സുരഭി എന്ന നടിയുടെ മേക്കോവർ നമ്മളെ ഞെട്ടിക്കും..സുരഭി ആണോ എന്നത് പോലും കൺഫ്യൂഷൻ ഉണ്ടാകുന്ന തരത്തിൽ ഉള്ള വേഷം. തുടർന്ന് പോകുന്ന  ചട്ടക്കൂട്ടിൽ നിന്നും ഷൈൻ ടോം പുറത്ത് കടക്കേണ്ട് സമയം  അതിക്രമിച്ചു കഴിഞ്ഞു എന്ന് ചില സമയത്ത് എങ്കിലും അദ്ദേഹം വിളിച്ചു പറയുന്നുണ്ട് .

പ്ര .മോ. ദി .സം

ഗരുഡ ഗമന വൃഷഭ വാഹന

 

ഇപ്പൊൾ കന്നഡ സിനിമകൾ ഇന്ത്യയിൽ ചരിത്രം സൃഷ്ടിച്ചു മുന്നേറുമ്പോൾ  അവഗണിക്കപ്പെട്ട സന്ദാൽ വുഡിനോട് ഒരു സ്നേഹം ഒക്കെ പലർക്കും  തോന്നിതുടങ്ങി. 

ഷെട്ടി ബ്രദേഴ്സ് കന്നഡയിൽ ചരിത്രം സൃഷ്ട്ടിക്കുമ്പോൾ അവരുടെ സിനിമകൾ ഇന്ത്യയിൽ മുഴുവൻ ചരിത്രം സൃഷ്ട്ടിക്കുപോൾ അവരുടെ സിനിമകൾ തിരഞ്ഞ് പിടിച്ച് കാണുവാൻ പ്രത്യേകം ഒരു താൽപര്യം.അങ്ങിനെ തിരഞ്ഞ് പിടിച്ചതാണ് ഈ സിനിമ.

രാജ് ബി ഷെട്ടി ,രക്ഷിദ് ഷെട്ടി, റി ഷബ് ഷെട്ടിമാർ ആണ് ഇപ്പൊൾ കന്നഡ സിനിമയിലെ താരങ്ങൾ.. കെ ജീ എഫ് സൃഷ്ടിച്ച പ്രകമ്പനത്തിൽ ഉണർന്നത് കന്നഡ ഇൻഡസ്ട്രി ആണ്. ചാർളി 777,കേ ജീ എഫ് സിനിമകൾ,വിക്രാന്ത് രോണ,കാന്താരാ തുടങ്ങിയവ ഇന്ത്യൻ ബോക്സ് ഓഫീസ് പിടിച്ച് കുലുക്കിയപ്പോൾ അവരുടെ സിനിമകളുടെ ഗതി തന്നെ മാറി.

മിത്തോളജി പ്രകാരം സിനിമയുടെ പേര് സൂചിപ്പിക്കുന്നത് ശിവനെയും വിഷ്ണുവിനേയും ആണ്. സുഹൃത്തുക്കൾ ആയ ശിവയുടെയും ഹരിയുടെയും കഥയാണ് ഇത്. അവരുടെ താണ്ഡവം തന്നെയാണ് മുഴുവൻ...പറഞ്ഞു വരുമ്പോൾ നമ്മുടെ കമ്മട്ടിപാടം പോലത്തെ ഗെറ്റപ്പിൽ ഉള്ള ഒരു സിനിമ.

സൗഹൃദത്തിൻ്റെയും ഗ്യാങ്ങു വാറിൻ്റെയും കഥ പറയുന്ന സിനിമ അഭിനയം കൊണ്ടും അവതരണം കൊണ്ടും നമ്മളെ മുഴുവൻ സമയവും പിടിച്ച് ഇരുത്തുന്നു.

പരുക്ക് പറ്റി അവശനായ അനാഥനായ ശിവയെ ഹരിയുടെ അമ്മ എടുത്ത് വളർത്തുന്നു.സ്വന്തമായ ബിസിനെസ്സ് ചെയ്യുമ്പോൾ ഉണ്ടായ ഒരു സംഭവം അവർക്ക് ഗുണ്ടാ പരിവേഷം നൽകുന്നു. പിന്നിട് പലരും പല കാര്യത്തിലും അവരെ തേടി എത്തുമ്പോൾ അവർ ഗ്യാങ് ലീഡർമാർ ആയിമാറുന്നു.കൊല്ലും കൊലയുമായി നാട് ഭരിക്കുന്ന അവരിൽ ഉണ്ടാകുന്ന ഭിന്നിപ്പ് പുതിയ പ്രശ്നങ്ങൾ അവർക്കിടയിൽ സൃഷ്ടിക്കുന്നു.

രാജ് ബി ഷെട്ടി സംവിധാനവും അഭിനയവും കൊണ്ട് വിസ്മയം സൃഷ്ട്ടിക്കുന്നു ഒപ്പത്തിനൊപ്പം കാന്താര നായകൻ രിഷബു ഷെട്ടിയും...

പ്ര .മോ. ദി .സം

ജയ ജയ ജയ ജയഹേ

ചില സിനിമകൾ ഉണ്ട്... പ്രേക്ഷകനെ രസിപ്പിക്കണം എന്ന് ആത്മാർത്ഥമായി  അണിയറ പ്രവര്ത്തകര് ചിന്തിച്ചു കൊണ്ട് സത്യസന്ധമായി  എടുക്കുന്ന സിനിമകൾ..അതിലെ ഓരോ ആൾക്കാരിലും സിനിമയോടുള്ള സ്നേഹവും പ്രതിബദ്ധതയും  കടപ്പാടും  ഉണ്ടാകും.അത് കൊണ്ട് തന്നെ അതിൻ്റെ റിസൾട്ട് ഗുണമുള്ളത് ആയിരിക്കും.

അതിൽ മാസ് രംഗങ്ങൾ,സൂപ്പർ നടന്മാർ ,കോരിത്തരിപ്പിക്കുന്ന ബിജിഎം ഒന്നും കാണില്ല.എങ്കിൽ പോലും സിനിമ നമ്മളെ മുഴുവൻ സമയവും രസിപ്പിക്കും..ചിരിപ്പിക്കും രസിപ്പിക്കും. 

വലിയ സിനിമകൾ കണ്ടു ഇത്രയും എക്സ്പീരിയൻസ് ആയവരോക്കെ ഇങ്ങിനെയൊക്കെ പ്രേക്ഷകനെ ചതിക്കുമല്ലോ എന്ന് വിചാരിച്ചു കഴിയുന്ന സമയത്ത് ഇത്തരം ചിത്രങ്ങൾ കാണുമ്പോൾ സിനിമയോട് ഇല്ലതായിപോകുന്ന സ്നേഹം തിരിച്ചു വരും.

സ്ത്രീക്ക് അവളുടെ കുടുംബത്തിൽ അല്ലെങ്കിൽ അവള് കല്യാണം കഴിച്ചു പോകുന്ന കുടുംബത്തിൽ ഉണ്ടാകുന്ന പലതരം പ്രശ്നങ്ങൾ ഉണ്ടാകും.അതൊന്നും മനസ്സിലാക്കുവാൻ സ്വന്തകാർക്ക് പോലും പറ്റിയെന്നും വരില്ല.അ പ്പോൾ  ഒറ്റപ്പെട്ടു പോകുന്ന അവള് അതൊക്കെ പരിഹരിക്കുവാൻ സ്വയം ഇറങ്ങിതിരിക്കേണ്ടി വന്നേക്കും.

അത്തരത്തിൽ നിലനിൽപ്പിന് വേണ്ടി പോരാടുന്ന ജയഭാരതിയുടെ കഥയാണ് ജയ ജയ ജയ ജയ ജയഹേ...ബാസിലും ദർശനവും തമ്മിലുള്ള കെമിസ്ട്രി നമ്മളെ  ഒരു മിനിട്ട് പോലും മുഷിപ്പിക്കാതെ പിടിച്ചിരുത്തി കളയും.

സമകാലിക രാഷ്ട്രീയം നർമത്തിലൂടെ ചില സമയങ്ങളിൽ കടന്നുവരുന്ന ചിത്രത്തിലെ നായകൻ്റെ വീടിൻ്റെ പേര് ശ്രദ്ധിച്ചാൽ മാത്രം മതി  ചില ഇന്നിൻ്റെ രാഷ്ട്രീയ സംഭവങ്ങൾ  നമ്മുടെ മനസ്സിലൂടെ കടന്നു പോകും..

പ്ര .മോ .ദി .സം

മോൺസ്റ്റർ

 

"എന്താടോ താൻ നന്നാവാത്തെ..."ലാലേട്ടൻ ഒരു സിനിമയിൽ പറയുന്ന ഡയലോഗ് ആണ്..അത് ഇന്ന് പ്രേക്ഷകർ തിരിച്ചു ലാലേട്ടനോട് ചോദിക്കേണ്ട ഗതികേടിൽ ആണ്..

ഒന്നിന് പിറകെ ഒന്നായി ഒന്നിനും കൊള്ളാത്ത സിനിമകൾ കൊണ്ട് വെറുപ്പിക്കുന്ന ലാലേട്ടനെ ആണിന്ന് ഇവിടെ കാണുവാൻ പറ്റുന്നത്.

ശരിക്കും ലാലേട്ടൻ സുഹൃത്ത് മമ്മൂക്കയെ കണ്ടു പഠിക്കണം..പതുങ്ങേണ്ട സ്ഥലത്ത് മറ്റുള്ളവർക്ക് അവസരം കൊടുത്തു (ഭീഷ്മപർവത്തിൽ)  പതുങ്ങിയും, ആറാട്ട് നടത്തേണ്ട ഇടങ്ങളിൽ ആറാടിയും (റോഷാക്ക്) വെറുപ്പിക്കേണ്ട സ്ഥലത്ത് ആർക്കും ഇഷട്ടപെടാത്ത പുഴു ആയും അദ്ദേഹം ഇന്ന് ഇടിഞ്ഞുതാണ് പോകുമായിരുന്ന കരിയറിൽ അൽഭുത പൂർവമായ പ്രകടനം ആണ് കാഴ്ച വെക്കുന്നത്.

സ്ഥിരം ലാലേട്ടൻ സിനിമ പോലെ നവ മാധ്യമങ്ങളിൽ കണ്ടതൊക്കെ വെറും നെഗറ്റീവ് പബ്ലിസിറ്റി മാത്രം ആകണമെ എന്ന് പ്രാർത്ഥിച്ചു കൊണ്ടാണ് സിനിമ കാണുവാൻ ആരംഭിച്ചത്. ഇതുവരെ കാണാത്ത പ്രമേയം ,ഹണി റോസിൻ്റെ ഇതുവരെ ഇല്ലാത്ത മാസ്മരിക പ്രകടനം എന്നൊക്കെ പാണന്മാർ തട്ടി വിട്ടപ്പോൾ വെറുതെ ഒന്ന് പ്രതീക്ഷ വെച്ചു..

ഈ പ്രമേയം ഒക്കെ മലയാളത്തിൽ തന്നെ അടുത്ത കാലത്ത് ഒരു 18 പ്ലസ് സിനിമയിൽ ഉപയോഗിച്ചതാണ്. മറ്റു കാര്യങ്ങൽ ഒക്കെ പലരും പലതവണ പയറ്റിയ അന്വേഷണങ്ങളും. ഹണി റോസിന് അഭിമാനിക്കാൻ പറ്റും പക്ഷേ അതിൽ കൂടുതൽ "ഞെട്ടിച്ചത് " മറ്റെ കുട്ടിയാണ്.

ഇൻ്റർവെൽ വരെ ചളി തമാശയും ദ്വയാർത്ഥ പ്രയോഗങ്ങളും കൊണ്ട് ലാലേട്ടൻ അടക്കം മുഷിപ്പിക്കുന്ന സിനിമ അതിനു ശേഷം കുറച്ചെങ്കിലും ട്രാക്കിലേക്ക് വരുന്നുണ്ട്..പിന്നെ എന്തൊക്കെയോ കാട്ടി കൂട്ടി അവസാനം കുറച്ചു "കാര്യങ്ങളും" പറഞ്ഞു പുലിമുരുകൻ ടീം ശരിക്കും നിരാശപ്പെടുത്തുന്ന അവസ്ഥ.

ഇതിലും വലിയ പതനത്തിൽ നിന്നും ലാലേട്ടൻ  പലതവണ കര കയറിയത് കൊണ്ട് ഇനിയും പ്രതീക്ഷയുണ്ട് കാണികൾക്ക്... തീർച്ചയായും ...ചുറ്റുമുള്ള ഉപഗ്രഹങ്ങളുടെ ഇടപെടലുകൾ അവസാനിപ്പിക്കാൻ നേരമായി എന്ന് ലാലേട്ടന് തോന്നി തുടങ്ങിയത് കൊണ്ട് നമ്മളും പ്രതീക്ഷിക്കുന്നു.

പ്ര .മോ. ദി .സം