താങ്ക്യൂ

 

തെലുങ്ക് സിനിമ കാണുവാൻ നല്ല രസമാണ്..ഞാൻ പറഞ്ഞു വരുന്നത് മാസ് പടങ്ങൾ അല്ല ചെറിയ നടന്മാരുടെ ചിത്രങ്ങൾ മലയാളത്തിലേക്കൂ ഡബ്ബ് ചെയ്തു വരുന്നവ. 

എറ്റവും ആകർഷകം മലയാളത്തിലേക്ക് മൊഴി മാറ്റുമ്പോൾ ഉള്ള തർജിമ യാണ്..അത് ഒരിക്കലും കഠിന പദങ്ങൾ ആയിരിക്കില്ല..പാട്ടുകൾ  പോലും എല്ലാ വരിയും നമുക്ക് മനസ്സിലാകും. മലയാളത്തിൽ പോലും  അത് മനസ്സിലാവാൻ വളരെ  പാട് പെടുന്ന നമ്മക്ക്...ട്രോളുകൾ കുറെ വന്നെങ്കിലും പലർക്കും അത് ഇഷ്ടപ്പെടുന്നത് കൊണ്ടാണ് അത്തരം ചിത്രങ്ങൾ ഇവിടെ വിജയിക്കുന്നത്.

താങ്ക്യൂ എന്നത് അവിടുത്തെ പണം വാരി പടം ആണോ എന്ന് നിശ്ചയമില്ല..എങ്കിലും രണ്ടു മണിക്കൂർ നമ്മളെ ബോറടിപ്പിക്കാതെ കാണാൻ അനുവദിക്കുന്നുണ്ട്..സിമ്പിൾ കഥയും കാര്യങ്ങളും ഒക്കെയാണ് എങ്കിലും അത് ഒരുക്കിയവർക്ക് താങ്ക്യൂ പറയുവാൻ നമ്മളെ പ്രേരിപ്പിക്കുന്നു.

നമ്മളെ ഒരു പരിധിവരെ വെറുപ്പിക്കുന്ന നാഗചൈതന്യ എന്ന നായകനെ പിന്നെ അയാളുടെ ചെയ്തികൾ കൊണ്ട്  നമുക്ക് ഇഷ്ടപ്പെട്ടു പോകുകയാണ്.

 ഒളിചോട്ടത്തിനിടയിൽ ഒന്നിലും കോമ്പ്രമൈസ് ചെയ്യരുത് എന്ന് പഠിപ്പിക്കുന്ന കാമുകി നഷ്ടപ്പെട്ടു എങ്കിലും അവള് പറഞ്ഞതിലൂടെ മുന്നേറുന്ന നായകൻ എല്ലാം വെട്ടി പിടിക്കുന്നു എങ്കിലും പലതും നഷ്ടപ്പെടുമ്പോൾ അയാൾക്ക് വന്ന വഴിയിലേക്ക് തിരിഞ്ഞു നടക്കേണ്ടി വരുന്നു .

അയാളെ ഈ നിലയിൽ എത്തിച്ചവർക്ക് നന്ദി പറയുവാൻ വേണ്ടി മാത്രം തിരിഞ്ഞു നടന്ന അയാൾക്ക് പലതും തിരികെ നേടാൻ പറ്റുന്നു.മൂന്ന് നായികമാർ ഉണ്ടെങ്കിലും അവരെ മൂലയിൽ ഒതുക്കാതെ ഓരോരുത്തർക്കും നല്ല വേഷങ്ങൾ നൽകി അടയാളപ്പെടുത്തുന്നു.

പ്ര .മോ .ദി .സം

സോളമൻ്റെ തേനീച്ചകൾ

 

പഠിപ്പിൽ മിടുക്കനായ ഒരു വിദ്യാർത്ഥി കുറെക്കാലം ഉഴപ്പിനടന്ന് പരാജയങ്ങൾ ഏറ്റുവാങ്ങിയെങ്കിലും പിന്നെ എന്തോ ബോധോദയം ഉണ്ടായപ്പോൾ പഠിച്ചു തുടങ്ങുകയും...ചെറിയ ചെറിയ വിജയങ്ങൾ നേടി കൊണ്ട് പഴയ പ്രതാപത്തിൻ്റെ ലക്ഷങ്ങൾ കാണിച്ചു തുടങ്ങുകയും ചെയ്യുന്നു.

പറഞ്ഞത് ചിത്രത്തിൻ്റെ കഥയല്ല.സംവിധായകനെ കുറിച്ചാണ്..മുൻപ് ഉണ്ടായിരുന്ന പ്രതിഭയുടെ ലേശം പോലും കുറെയായി ലാൽജോസിൻ്റെ സിനിമ കണ്ടാൽ തോന്നില്ല.പക്ഷേ ഈ ചിത്രത്തിൽ താൻ മടങ്ങി വരും എന്ന് അദ്ദേഹം സൂചിപ്പിക്കുന്നു.മടങ്ങി വന്നാൽ നല്ലത്..അദ്ദേഹത്തിനും മലയാള സിനിമക്കും ഗുണം ചെയ്യുക തന്നെ ചെയ്യും.

 നല്ല സുഹൃത്തുക്കൾ ആയ  രണ്ടു പോലീസുകാരികളിലൂടെ  ആണ് കഥ പോകുന്നതും.എന്തിനും ഏതിനും പരസ്പര കൂട്ടുള്ള ഒന്നിച്ചു താമസിക്കുന്ന അവരിലേക്ക് ഒരാള് കടന്നു വരുന്നു.  അതിൽ ഒരാള്മായി പ്രണയത്തിലാകുന്നു. മുൻപും പിൻപും അറിയാത്ത അയാള് മൂലം ഇവർ  രണ്ടു പേരും ഒരു പ്രശ്നത്തിൽപെടുന്നതും  അത് അവരുടെ ജീവിതത്തിൽ ഉണ്ടാക്കുന്ന വെല്ലുവിളികൾ ആണ് 

സോളമൻ്റെ തേനീച്ചകൾ.

 ഒരു ക്രൈം ത്രില്ലർ ഇനത്തിൽ പെട്ട സിനിമ അതിൻ്റെ വ്യതസ്ത  പാശ്ചാത്തലം കൊണ്ടും അവതരണ ഭംഗി കൊണ്ട് ഒക്കെ ശ്രദ്ധിക്കാപെടും. പഴയ താരങ്ങൾക്കൊപ്പം പുതിയവർക്കും നല്ലൊരു അവസരം കൊടുക്കുന്ന ചിത്രം വിദ്യാസാഗറിൻ്റെ സംഗീതം കൂടി തിരിച്ചു കൊണ്ട് വരുന്നുണ്ട്.

പ്ര .മോ .ദി. സം

പീസ്

മനുഷ്യർ എപ്പോഴാണ് എടാകൂടങ്ങളിൽ ചെന്ന് ചാടുക എന്ന് പറയുക വയ്യ.നമ്മുടെ ചെറിയ ഒരു അശ്രദ്ധ, ചിലപ്പോൾ ലഹരികൾ തരുന്ന ധൈര്യം, അല്ലെങ്കിൽ സുഹൃത്തുക്കൾക്ക് വേണ്ടിയുള്ള എല്ലാം മറന്നുള്ള  ഓട്ടം അങ്ങിനെ പലതും നമ്മളെ എത്തിക്കുന്നത് ചിലപ്പോൾ വല്യ കെണികളിൽ ആയിരിക്കും.പറ്റിയ അബദ്ധങ്ങൾ മാറ്റാൻ നമ്മൾ വീണ്ടും വീണ്ടും പ്രശ്നങ്ങളിലേക്ക് പോകും.

"ഗ്ലാസ്സ്" മീറ്റ്മായി മകളുടെ വിവാഹം ഉറപ്പിച്ച സന്തോഷത്തിൽ മതിമറന്ന് ആഘോഷിച്ച രാത്രിയിൽ സുഹൃത്തിനെ കൊണ്ട് വിടുവാൻ അവൻ്റെ കൂട്ടുകാരോടൊത്ത് റെയ്ൽവേ സ്റ്റേഷനിലേക്ക് പോകുമ്പോൾ ഉണ്ടാകുന്ന "അപകടം" ഇവരുടെ ഒക്കെ ജീവിതം നിൽക്കകള്ളി യില്ലാതാക്കുന്നതാണ് പീസ് ഒന്നാം ഭാഗം പറയുന്നത്.

ഹാസ്യത്തിൻ്റെ മേമ്പൊടി കൊണ്ട് സമൂഹത്തിലെ പല കൊള്ളരുതായ്മകൾ ചൂണ്ടി കാണിക്കുന്ന ചിത്രം മുറിയാത്ത രസച്ചരട് നൽകുന്നുണ്ട്.ചില സമയത്ത് അതി നാടകീയത തോന്നും എങ്കിൽ കൂടി....

മദ്യപാനം,പുകവലി ,ലഹരിമരുന്ന് സയിൽ തുടങ്ങി ഇന്നത്തെ തലമുറയുടെ മുഴുവൻ തൊട്ടി ത്തരങ്ങളും നായകനും കൂട്ടാളികളും ചെയ്യുന്നുണ്ട്. പണം ഉണ്ടാക്കുവാൻ ഇതുവരെ ആരും ചെയ്യാത്ത പുതിയ ഒരു കാര്യം കൂടി ചിത്രത്തിൽ രസകരമായി അവതരിപ്പിക്കുന്നുണ്ട്.പണം ഉണ്ടാക്കാൻ ഇനി ചിലർ അതും പരീക്ഷിച്ച് നോക്കും.

അന്തരിച്ച അനിൽ നെടുമങ്ങാട്,കോട്ടയം പ്രേമൻ എന്നിവർ അഭിനയിച്ച അവസാന സിനിമ ആണെന്ന് തോന്നുന്നു.അനിലിന് മുഴുനീള വേഷം ഉണ്ടായിരുന്നു..അത് അദ്ദേഹം തകർത്തിട്ടുണ്ട്..രണ്ടാം ഭാഗം വരുന്നു എന്ന് പറയുന്നത് കൊണ്ട്  അനിവാര്യമായ അനിലിൻ്റെ റോൾ എന്ത് ചെയ്യും എന്ന സംശയവും നമുക്ക്  ഉണ്ടാവാം

പ്ര .മോ .ദി .സം

ഒരു തെക്കൻ തല്ല് കേസ്

 

ഓണക്കാലത്ത് തന്നെ കാണണം എന്ന് വിചാരിച്ച സിനിമ കാണുവാൻ വൈകി.ഇപ്പൊൾ പല കാരണങ്ങൾ കൊണ്ട് അത് നന്നായി എന്ന് തോന്നുന്നു. കാരണം ആ സമയത്ത് പലവിധ തിരക്കുകൾ ഉണ്ടായിരുന്നു.രണ്ടു രണ്ടര മണിക്കൂർ തിയേറ്ററിൽ ചിലവിടാൻ പറ്റാത്ത അത്രക്ക് "തിരക്ക്"

പലർക്കും ഇഷ്ട്ടപെട്ട നല്ല അഭിപ്രായം കിട്ടിയ മനോഹരമായ ഒരു കഥ സിനിമ ആക്കുമ്പോൾ പലതരം പ്രശ്നങ്ങൾ ഉണ്ടാകും.കഥയോട് നീതി പുലർത്താൻ അങ്ങേയറ്റം ആത്മാർത്ഥമായി ശ്രമിക്കണം..കാരണം വലിയ പ്രതീക്ഷ ആയിരിക്കും വായിച്ചവർക്ക്.. പുസ്തക താളുകളിൽ ത്രിൽ അടിപ്പിച്ച അമ്മിണി ,പൊടിയൻ എന്നിവർക്ക് ജീവൻ വെച്ചാൽ എങ്ങനെയിരിക്കും എന്ന കൗതുകം കൂടി മനസ്സിൽ കടന്നുകൂടിയിട്ടുണ്ടാവും.

ഒരു ചെറിയ എപ്പിസോഡ് കൊണ്ട് മികവുറ്റ സൃഷ്ട്ടി ആകാമായിരുന്നു എന്ന് തോന്നുന്നു സിനിമയുടെ വലിച്ചു നീട്ടലുകൾ കണ്ടപ്പോൾ.. പാശ്ചാത്തലം ,വേഷം,ഭാഷ,ഫ്രെയിമുകൾ എന്നിവയിൽ കയ്യടി കൊടുക്കാൻ പറ്റുമെങ്കിൽ പോലും മൊത്തത്തിൽ ഒരു സുഖം കിട്ടുന്നില്ല.

 തെക്കൻ കടലോര ഗ്രാമത്തിലെ ലൈറ്റ് ഹൗസ് കാര്യസ്ഥനും നാട്ടിൽ ആരാധ്ന്യനും ദുരഭിമാനിയുമായ അമ്മിണി പിള്ളയും ഒരു പ്രേമത്തിൻ്റെ പേരിൽ ഉരസേണ്ടി വരുന്ന പോടിയൻ്റെ കൂടെയുള്ള  കുറച്ചു യുവാക്കളും തമ്മില്ലുള്ള ഈഗോയും വെറുപ്പും പ്രതികാരവും ഒക്കെയാണ് സിനിമ.

ബിജു ,റോഷൻ,പത്മപ്രിയ എന്നിവർ അടക്കം എല്ലാവരും വേഷങ്ങൾ നന്നായി ചെയ്തു എങ്കിലും പ്രേക്ഷകരെ ആകർഷിക്കുവാൻ അത് പോരായിരുന്നു.

പ്ര .മോ. ദി .സം

റോ ഷാ ക്ക്

 

ഒരു സിനിമയിൽ അഭിനയിച്ച മുഴുവൻ ആൾക്കാരും പിന്നണിയിൽ പ്രവർത്തിച്ചവർ ഒക്കെ കരിയർ ബെസ്റ്റ് എന്ന് അടയാളപ്പെടുത്തുന്ന ചിത്രം ചെയ്യുക എന്നതും നമ്മുടെ സ്വകാര്യ അഹങ്കാരവും എന്നും പുതുമകൾ തേടി പോകുന്ന മലയാളത്തിൻ്റെ മഹാനടൻ അത് നിർമിച്ചു എന്നതും ഇൻഡസ്ട്രി ക്കു അഭിമാനമാണ്.

ഒരു പക്ഷെ കഴിവുകൾ ഉള്ളവരെ തിരഞ്ഞ് പിടിച്ച് ഡേറ്റ് കൊടുത്ത് സംവിധാനം ചെയ്യിക്കുന്ന അഭിനേതാവ് ലോകത്തിൽ മമ്മൂട്ടി മാത്രേ കാണൂ.അങ്ങിനെ മമ്മൂക്കയുടെ കണ്ടെത്തലുകൾ ഒന്നും പാഴായി പോയിട്ടും ഇല്ല.പുതുമകൾ തേടിയുള്ള ലാഭ പ്രതീക്ഷയില്ലതെ അദ്ദേഹത്തിൻ്റെ യാത്ര ഇന്നും മലയാളത്തിന് മുതൽക്കൂട്ട് തന്നെയാണ്.

ഭീഷ്മപർവ്വത്തിൽ കഥക്ക് അനുസരിച്ച് ഒതുങ്ങി നിന്ന് എങ്കിലും ഇതിൽ തിരക്കഥ ആവശ്യപ്പെടുന്നത് പോലെ പൂണ്ടു വിളയാട്ടം തന്നെയാണ്.ക്ലോസ് അപ്പ് രംഗങ്ങളിൽ മമ്മൂട്ടിയിലെ എഴുപതുകാരനെ തിരിച്ചറിയുന്നു എങ്കിലും സ്റ്റണ്ട് രംഗങ്ങളിലും മറ്റും ഉള്ള യുവാവിൻ്റെ പോലെയുള്ള ചുറുചുറുക്ക് അൽഭുതം തരുന്നു.

പ്രതികാരമെന്നത് ഒരിക്കലും അവസാനിക്കാത്ത ഒന്നാണ്. അത് പലപ്പോഴും അൺ സ്റ്റോപ്പബിൾ ആകാം അൺ ലിമിറ്റഡ് ആയി മാറാം.അതിനു പിറകെ പോകുമ്പോൾ  ഒന്നിന് പിറകെ ഒന്നായി അതുമായി ബന്ധപ്പെട്ട കുറെയെറെ പേരെ കാണാം..അവരെയോക്കെ ഒതുക്കി വരുമ്പോൾ പുതിയ പ്രശ്നങ്ങൾ തലപോക്കും.

തുടക്കം മുതൽ ഒടുക്കം വരെ പ്രേക്ഷകനെ മുൾമുനയിൽ നിർത്തി  സ്ക്രീനിലെ ലൈറ്റ് പാറ്റേൺ കൊണ്ടും സംഗീതം കൊണ്ടും മലയാളത്തിൽ പുതിയൊരു അനുഭവം തന്നെയാണ് നിസാം ബഷീർ എന്ന സംവിധായകൻ സൃഷ്ടിച്ചിരിക്കുന്നത് .കെട്ടിയോൾ എൻ്റെ മാലാഖ എന്ന ചിത്രത്തിലൂടെ വേറിട്ടൊരു അനുഭവമായി വന്ന സംവിധായകൻ മലയാളത്തിന് മുതൽക്കൂട്ട് തന്നെയാകും.സംശയമില്ല.

പ്ര .മോ .ദി .സം