രായൻ

 

ധനുഷ് തൻ്റെ അമ്പതാമത്തെ ചിത്രം അഭിനയത്തിന് പുറമെ എഴുത്ത് കൂടി നടത്തി സംവിധാനം ചെയ്തിരിക്കുന്നു.എഴുത്തിൽ അതിൻ്റെ കഥയിൽ പുതുമ ഒന്നും അവകാശപ്പെടുവാൻ ഇല്ലെങ്കിൽ പോലും മേക്കിംഗ് കൊണ്ട് എല്ലാവരെയും പിടിച്ചിരുത്തുന്ന തരത്തിൽ നന്നായി തന്നെ അദ്ദേഹം അവതരിപ്പിച്ചിട്ടുണ്ട്.

നാല് മക്കളെ മാതാപിതാക്കൾ "ഉപേക്ഷിച്ച്" പോയത് കൊണ്ട് മാത്രം കുടുംബത്തിൻ്റെ ബാധ്യത ഏറ്റെടുത്ത മൂത്തവൻ രായൻ ഫാസ്റ്റ് ഫുഡ് ഷോപ്പ് നടത്തി  ജീവിതം മുന്നോട്ടു ക്കൊണ്ട് പോകുന്നു.  പലതരം പ്രശ്നങ്ങളിൽ പെട്ട് ഉഴലുന്ന ആൾ എന്ന് കാണിക്കുവാൻ  സ്വതവേ ഗൗരവകരമായ ഒരു അവസ്ഥ അഭിനയത്തിൽ ധനുഷ് ഒട്ടിച്ചു വെക്കുന്നുണ്ട്.

സഹോദരർ ഒരുത്തൻ റൗഡിയായി സകല ഉഡായിപ്പിലും പെട്ട് രായന് തലവേദന ആകുന്നു എങ്കിലും എല്ലായിടത്തും അവനെ രായൻ സംരക്ഷിക്കുന്നു. കോളേജിൽ പോകുന്ന ഇളയവന് സ്വാതന്ത്രം കൂടുതൽ കൊടുത്തിട്ട് ഉണ്ടെങ്കിൽ കൂടി  അവനെയും പരിധിക്ക് അപ്പുറത്ത് വിടാത്തത് കൊണ്ട് പേടിയോടെ രായനെ അനുസരിച്ച് തന്നെ മുന്നോട്ടു പോകുന്നു.

കൂട്ടത്തിൽ ഇളയവൾ കുഞ്ഞിപെങ്ങൾ ദുർഗ്ഗാ യുമായിട്ടാണ് ഗൗരവം വിട്ടു റായൻ സംസാരിക്കുന്നത്.പെങ്ങൾക്ക് വേണ്ടി എന്തും ചെയ്യുന്ന അനിയത്തിയും ചേട്ടന് വേണ്ടി എന്തും ചെയ്യുന്ന പെങ്ങളും തന്നെയാണ് ചിത്രത്തിൻ്റെ ഹൈലൈറ്റ്. അണ്ണൻ തങ്കച്ചി പാശം തമിഴു സിനിമയുടെ മുഖ്യ  ഘടകം ആയതു കൊണ്ട് തന്നെ ഇതിനെ ചുറ്റിപറ്റി തന്നെയാണ് കഥ വികസിക്കുന്നത്.

നഗരത്തിലെ ദാദാക്കളുമായി ഉണ്ടാകുന്ന പ്രശ്നം വളർന്നു വലുതായി ഇവരുടെ കുടുംബ ജീവിതത്തിൽ കറുത്ത പാടുകൾ സൃഷ്ടിക്കുമ്പോൾ ആണ് സിനിമ കൂടുതൽ ഉഷാർ ആകുന്നത്. അത് കുടുംബത്തിൽ ഉണ്ടാക്കുന്ന നഷ്ടങ്ങൾ കുറയ്ക്കുവാൻ രായനും സഹോദരങ്ങളും പൊരുതുമ്പോൾ ഇടക്ക് വെച്ച് കളി കൈവിട്ടു പോകുന്നു.

സംഭവങ്ങൾ ഒക്കെ കൃത്യമായി പറയുന്നുണ്ട് എങ്കിൽ കൂടി എവിടെയൊക്കെയോ നമ്മളെ അത് വിശ്വസനീയമായ രീതിയിൽ പറഞ്ഞു മനസ്സിലാക്കുവാൻ ധനുഷിൻ്റെ എഴുത്തിന് കഴിയുന്നില്ല..എങ്കിൽ കൂടി അവതരണത്തിൽ കൂടിയും അഭിനയത്തിൽ കൂടിയും അതിനെ കവച്ചു വെക്കുവാൻ ധനുഷിന് കഴിഞ്ഞിട്ടുണ്ട്.

സംഗീതത്തിൽ എ ആറ്.റഹ്മാന് മുൻപുള്ള മായാജാലം നഷ്ടപ്പെട്ടു എന്ന് തോന്നുന്നു.കാളിദാസ്,ദുശാര,എസ്.ജെ സൂര്യ, സുന്തീപ്,അപർണ, സെൽവ രാഘവൻ, പ്രകാശ് രാജ് എന്നിവർ ധനുഷിന് മികച്ച പിന്തുണ നൽകുന്നുണ്ട്.

പ്ര.മോ.ദി.സം 

തങ്കലാൻ

 

ബ്രിട്ടീഷ്  രാജ് ഉള്ള കാലത്തെ കഥയാണ് ഇത്തവണ പാ രഞ്ജിത്ത് എന്ന സംവിധായകൻ പറയുന്നത്..അദ്ദേഹത്തിൻ്റെ എല്ലാ ചിത്രങ്ങളിൽ ഉള്ളത് പോലെ ശക്തമായ രാഷ്ട്രീയത്തിൽ കൂടി പാർശ്വ വൽകരിക്കപെട്ട മനുഷ്യരുടെ കഥപറയുന്ന ചിത്രത്തിൽ വിക്രം,പാർവതി,മാളവിക,പശുപതി എന്നിവരാണ് മുഖ്യ വേഷത്തിൽ.

ഭാര്യക്കും മക്കൾക്കും ഒപ്പം കൃഷി ചെയ്തു അന്നന്നത്തെ ദിവസം കഴിക്കുന്ന തങ്കലാൻ ജന്മിമാരുടെ പിടിച്ചെടുക്കൽ കൊണ്ടും  വിദേശ ആക്രമണത്തിലും മറ്റും നഷ്ടപ്പെട്ടു പോയ സ്വന്തം കൃഷിഭൂമി തിരിച്ചു കിട്ടുവാനും അടിമ ജീവിതം നയിക്കുന്ന തന്നെ പോലെ ഉള്ളവരുടെ നന്മക്കും വേണ്ടി ബ്രിട്ടീഷ് കാരനായ ആൾക്ക് വേണ്ടി സ്വർണം തേടി പുറപ്പെടുന്നു. തങ്ക ലാൻ്റെ കുടുംബത്തിന് മാത്രമേ അതെ കുറിച്ച് അറിയൂ എന്ന വിശ്വാസം അവനും അവൻ്റെ കഥ അറിയുന്ന നാട്ടുകാർക്കും ഉണ്ട്.

തൻ്റെ ഗ്രാമത്തിന് അപ്പുറത്തുള്ള മലതാണ്ടിയാൽ അപ്പുറത്ത് ആരതീ എന്ന  ഭൂതം കാക്കുന്ന സ്വർണമല ഉണ്ടെന്ന് വിശ്വസിക്കുന്ന തങ്കലാൻ ഗ്രാമീണരെ മുഴുവൻ സായിപ്പിൻ്റെ നിധി വേട്ടക്ക് അവിടേക്ക് കൊണ്ട് പോയി നിധി തിരയുന്നതാണ് ഇതിവൃത്തം.

പൊന്നു,ഭൂമി, പെണ്ണ് ഇവയാണ് ഒരു മനുഷ്യനെ  മയക്കുന്നതും നയിക്കുന്നതും എന്ന് പറഞ്ഞു വരുന്ന ചിത്രത്തിൽ മഞ്ഞ ലോഹം മനുഷ്യരെ എത്രമാത്രം സ്വാർത്ഥന്മാർ ആക്കുന്നത് കൂടി പറഞ്ഞു വെക്കുന്നുണ്ട്. അത് കിട്ടുമ്പോൾ ഉള്ള ആർത്തി കൊണ്ട് "മനുഷ്യർ" അല്ലാതായി പോകുന്നതും കാണിച്ചു തരുന്നുണ്ട്.

പാ രഞ്ജിത്ത് സിനിമകൾ അല്പം ലാഗ് ആണെങ്കിലും തിരക്കഥ യില് ഉണ്ടാകുന്ന പോരായ്മകൾ ഇടവേളക്ക് ശേഷം വീണ്ടും സ്പീഡ് കുറയുകയും ചില മുൻ തമിഴു പീരിയഡ് മൂവിയെ ഓർമിപ്പിക്കുന്ന അവസ്ഥയും ഉണ്ട്. ചിത്രത്തിൻ്റെ നീളവും കുറച്ചു നല്ലത് പോലെ എഡിറ്റ് ചെയ്തിരുന്നു എങ്കിൽ കുറച്ചു കൂടെ നന്നാക്കാമായിരുന്നു.

പലപ്പോഴും സംഭാഷണങ്ങൾ പഴയ തമിഴിൽ ആയതു കൊണ്ട് തന്നെ മറ്റു നാട്ടുകാർക്ക് അതിലേക്ക് എത്തുവാൻ പ്രയാസം നേരിടുന്നുണ്ട്. അതും വലിയൊരു പോരായ്മയായി ആസ്വാദനത്തെ ബാധിക്കുന്നുണ്ട്.

വിക്രമിൻ്റെ അതുല്യ അഭിനയത്തിൽ സിനിമയുടെ നെഗറ്റീവ് വശം ഏറെക്കുറെ മറന്നു പോകുന്നുണ്ട്..കൂട്ടിനു പാർവതി ,മാളവിക എന്നിവർ കൂടി നല്ല പ്രകടനം കാഴ്ച വെക്കുന്നുണ്ട്.കൂടാതെ സംഗീതവും ക്യാമറാ ദൃശ്യങ്ങൾ ഒക്കെ നല്ല ഫീലിംഗ് നൽകുന്നുണ്ട്.പഴയ കാലത്തെ ഒരുക്കുന്നതിൽ  കലാ സംവിധായകനും പിടിപ്പതു പണി എടുത്തിട്ടുണ്ട്.

പ്ര.മോ.ദി.സം.

നുണക്കുഴി

 

മുൻപ് , അധികം മുന്പള്ളതല്ല ഒരു ബാല   താരം മൂത്ത് യുവനടിയായ ആൾ പറഞ്ഞിരുന്നു ഫേസ് ബുക്ക് ഒക്കെ ആൻ്റി,അങ്കിൾമാരുടെയാണ് നമ്മുടേത് ഇൻസ്റ്റഗ്രാം, വാട്ട്സ് ആപ്പ് ഒക്കെയാണ് എന്ന്....കാരണം അത് പഴഞ്ചൻ ആയിപ്പോയി എന്നാണ് അവർ ഉദ്ദേശിച്ചത്.ഒട്ടും അപ്ഡേറ്റ് അല്ല ഇപ്പൊൾ ഉള്ള ആൻ്റിയും അങ്കിളും എന്ന്...അത് കൊണ്ടാണ് യുവാക്കൾ. മാത്രം ന്യൂ ജെൻ  സിനിമ കാണാൻ തിയേറ്ററിൽ കയറുന്നത് എന്നും

ഗുരുവായൂർ അമ്പലനടയിൽ, നുണക്കുഴി തുടങ്ങിയ ചിത്രങ്ങൾ പുതുതലമുറ ആഘോഷിക്കുമ്പോൾ ഈ അങ്കിൾമാർക്കും ആൻ്റി മാർക്കും പറയുവാനുള്ളത് ഇതൊക്കെ എൺപത് തൊണ്ണൂറുകളിൽ പ്രിയദർശനും ,സത്യൻ അന്തിക്കാട്,ബാലുകിരിയത്ത് തുടങ്ങിയവർ പണ്ടെ നമുക്ക് കാണിച്ച് തന്നത് ആണെന്നാണ്. നിങ്ങൾക്ക് ഇതൊക്കെ ആസ്വദിക്കുവാൻ പണ്ട് കാലത്ത് ഉള്ള തീം കോപ്പി അടിച്ചു ഉപയോഗിക്കേണ്ടി വന്നു എന്ന് മാത്രം. ന്യൂ ജെൻ എന്ന രീതിയിൽ പടച്ചു വിടുന്നത് യുവാക്കൾക്കും മടുത്തു തുടങ്ങി.

ഇതിലെ കോമഡികൾ കണ്ട് പഴയ തലമുറക്ക് ചിരിവരാത്തത് അവർ അപ് ഡേറ്റ് ആയതുകൊണ്ടാണ്..കാരണം പത്ത് മുപ്പതു വർഷങ്ങൾക്കു മുൻപ് ഇതുപോലത്തെ ചിത്രങ്ങൾ അവർ പല  തവണ കണ്ട് കഴിഞ്ഞിരിക്കുന്നു.അതിൽ കണ്ട് ചിരിച്ച അത്രയും ഒന്നും ഇതിലൊന്നും ഇല്ല. അത് കൊണ്ട് തന്നെ അവർക്ക് ചിരിയും വരില്ല  ചിന്തയും വരില്ല. അല്ലാതെ ജീവിത പ്രാരാബ് ധങ്ങൾ കൊണ്ട് അവർ മസ്സിൽ പിടിച്ചു ഇരിക്കുന്നത് ഒന്നുമല്ല എന്ന് മനസ്സിലാക്കുക.

തിയേറ്ററിൽ ഓളം ഉണ്ടാക്കുന്ന ഇത്തരം ചിത്രങ്ങൾ മിനി സ്ക്രീനിൽ,ഓട്ടിട്ടി പ്ലാറ്റ്ഫോമിൽ വരുമ്പോൾ ശ്രദ്ധിക്കപെടാതെ പോകുന്നതും ഈ പറഞ്ഞവയിലെ മെയിൻ കാഴ്ചക്കാരായിട്ടുള്ള അങ്കിൾ ആൻ്റിമാർ തിരസ്കരികുന്നത് കൊണ്ട് തന്നെയാണ്.

ജിത്തു ജോസഫ് സംവിധാനം ചെയ്ത ചിത്രം ആയതുകൊണ്ട് തന്നെ ഇതിനെ പറ്റി വാ മുഴുക്കെ പറയാനും പബ്ലിസിറ്റി കൊടുത്ത് വർണ്ണന നൽകുവാനും വലിയൊരു ഫാൻ തന്നെ ഉണ്ടാകും...അതിൻ്റെ തള്ള് തന്നെയാണ് ഇപ്പൊൾ കാണുന്നത്..ഇത്തരം ചിത്രങ്ങൾ മുൻപ് കണ്ടിട്ടില്ലാത്തവർക്കു രസകരവും ഈ സീൻ പണ്ടെ "വിട്ടു" കഴിഞ്ഞവർക്ക്  ഒരു   തരം മടുപ്പും ആയിരിക്കും.

പ്ര.മോ.ദി.സം 

വാഴ

 

"നിങൾ ജീവിതത്തിൽ വിജയിച്ചു എന്ന് തീർച്ചയാക്കണം എങ്കിൽ നിങ്ങളെ മറ്റാരും അംഗീകരിക്കേണ്ട നിങ്ങളുടെ അച്ഛൻ മാത്രം അംഗീകരിച്ചാൽ മതി.മറ്റൊന്നും യഥാർഥത്തിൽ ജീവിതത്തിൻ്റെ വിജയമാകില്ല..

അടുത്തകാലത്ത് ഇറങ്ങിയ മലയാളം ചിത്രങ്ങൾക്കിടയിൽ ചിരിക്കാനും ചിന്തിക്കാനും "ആവശ്യം" ഉള്ളവർക്ക് കരയുവാനും ഉള്ള സിനിമയാണ് വിപിൻ ദാസിൻ്റെ രചനയിൽ ആനന്ദ് മേനോൻ സംവിധാനം ചെയ്ത ഈ ചിത്രം.

ബയോ പിക് ഓഫ് എ ബില്യൺ ബോയ്സ് എന്ന ടാഗ് ലൈനിൽ വന്ന ചിത്രം പറയുന്നതും സ്വന്തം ഇഷ്ടപ്രകാരം ജീവിതത്തിൽ ഒരു തീരുമാനവും എടുക്കാൻ പറ്റാത്ത കുറെയേറെ ആൺകുട്ടികളുടെ കഥയാണ്.

ഭൂരിഭാഗം പേരും ഇന്ന് പഠിക്കുന്നത് സ്വന്തം തീരുമാന പ്രകാരം തിരഞ്ഞെടുക്കുന്ന ഇഷ്ടമുള്ള വിഷയം ആയിരിക്കില്ല. വീട്ടുകാരുടെ സമ്മർദത്തിന് വഴങ്ങി അവരുടെ ആഗ്രഹത്തിന് അനുസരിച്ചുള്ള വിഷയത്തിലേക്ക് പോകേണ്ടി വരുന്ന കുട്ടികളിൽ പലർക്കും ഒരിക്കലും അവരുടെ സ്വപ്നം സാക്ഷാത്കരിക്കാൻ പറ്റാറില്ല. എന്തിന് അതിനു അനുവദിക്കുക കൂടിയില്ല.

അങ്ങിനെ   ജീവിതത്തിൽ ഒന്നും  ആവാൻ പറ്റാത്ത ലക്ഷകണക്കിന് ആൾക്കാർക്ക് വേണ്ടിയുള്ള സമർപ്പണം തന്നെയാണ് ഈ ചിത്രം.അതിൽ നിങ്ങളും ഉണ്ടാകും. വീട്ടുകാരുടെ ഇഷ്ട്ടങ്ങൾ സഫലീകരിക്കുവാൻ സ്വന്തം സ്വപ്നം കുഴിച്ചു മൂടിയ ആളുകൾ.

ചെറുപ്പം മുതലേ കൂട്ടുകാരായി എന്തിനും ഏതിനും കൂടെ നിൽക്കുന്ന ചങ്ക് ഫ്രണ്ട്സുകളെ വീട്ടുകാർ ഇഷ്ടപ്പെടുന്നില്ല എങ്കിൽ കൂടി വളർന്നു വലുതായും അവരുടെ സൗഹൃദത്തിന് ഇളക്കം തട്ടുനില്ല.. ഓരോരോ പ്രശ്നങ്ങളിൽ ചെന്ന് ചാടുമ്പോൾ അതിൽ നിന്നും ഊരിപോരാനായി അവർക്ക് വീട്ടുകാരുടെ പിന്തുണ കിട്ടുന്നു എങ്കിലും പിന്നിട് അങ്ങോട്ട് അവർക്കും അത് ബാധ്യതയാകുന്നു...അവരും കൈ ഒഴിയുന്നു. ഒന്നിച്ചുള്ളവർ ഒക്കെ നല്ല നിലയിൽ എത്തിയപ്പോൾ ഇവർ സമൂഹത്തിൽ പരിഹാസ്യർ ആകുന്നു.

സമൂഹത്തിൽ എന്തെങ്കിലും ആകണം എന്ന ചിന്തയിൽ ഒരു ജോലിക്ക് ശ്രമിക്കുന്നു എങ്കിലും ഒന്നും ശരിയാകാതെ അവർ ഒറ്റപ്പെട്ട് പോകുന്നു.

"പുതുമുഖങ്ങളെ"മുൻനിർത്തി "ഹാസ്യതാരങ്ങൾ"എന്ന് മുദ്രകുത്തിയവരെ നല്ല ക്യറക്ടർ റോളുകൾ നൽകിയ ചിത്രം കാണുമ്പോൾ നല്ലൊരു "ഫ്രഷ്‌നെസ്" അനുഭവപ്പെടും.

പ്ര.മോ.ദി.സം